Самарқанд шаҳридаги 42-мактабда тарих фанидан дарс берган ўқитувчи Иззатилло М.ни 15 киши калтаклагани ҳамда ўқитувчи олган тан жароҳатлари натижасида ҳаётдан кўз юмгани ҳақида хабар берилган эди. Самарқанд шаҳар халқ таълими бўлими мазкур хабарларга муносабат билдирди.
Маълум қилинишича, марҳум ўқитувчи Иззатилло М. Самарқанд шаҳар халқ таълими бўлими тасарруфидаги 42-умумий ўрта таълим мактабида 2018 йилнинг 3 сентябридан буён ишлаб келган. У тарих фани бўйича рус синфларига дарс бериб, жорий йилнинг 14 октябридан бошлаб мактабга келмаган.
Мактаб раҳбарияти томонидан суриштирилганда Иззатилло М. соғлиғи ёмонлиги, даволаниб, тиббий маълумотномалар билан мактабга қайтишини билдирган, аммо у мактабга қайтмаган. Мактаб директорининг ўқув ишлари бўйича ўринбосари Е.Шигай ўқитувчи Иззатилло М. билан телефон орқали боғланганда, у эндиликда тадбиркорлик фаолияти билан шуғулланмоқчи эканлигини, мактабдан эса ишдан бўшашини билдирган. Шу боис ўқитувчига ажратилган дарс соатлари тарих фани ўқитувчилари Ғ.Воҳидов ва Г.Сатторовага юклатилган.
Қайд этилишича, Самарқанд шаҳар халқ таълими бўлими ҳамда мактаб маъмурияти ўқитувчи Иззатилло М. билан содир бўлган аянчли ҳолатдан чуқур қайғуда эканлигини ҳамда барча самарқандлик педагог ходимлар номидан унинг яқинларига ҳамдардлик билдиради.
Изоҳ (0)