Эрондаги намойишлар вақтида Марказий разведкаси бюросига алоқадор 8 нафар одам ҳибсга олинган
Эрон ҳукумати бензин нархининг ошиши оқибатида мамлакатда ўтказилган норозилик намойишлари вақтида Марказий разведка бюросига алоқадор саккиз нафар одамни ҳибсга олган. Бу ҳақда «РИА Новости» хабар берди.
«Норозилик ҳаракатларида иштирок этаётган ва разведка органлари топшириқларини бажараётган олти нафар фуқаро, шунингдек, ахборотлар тўплаб уларни хорижга юбормоқчи бўлган яна икки нафар одам ҳибсга олинди», — дейилади Эрон ахборот (разведка) вазирлигининг баёнотида.
Мавзуга доир:
Эронда аҳолининг норозилик намойишлари 16 ноябрда ҳукуматнинг бензин нархини ошириш ҳақидаги қарорни имзолагани оқибатида бошланган. Эрон полицияси намойишчиларни тарқатиш учун уларга нисбатан ўқотар қуролдан фойдаланган. Норозиликлар туфайли 16 ноябрь куни Эронда интернет ўчириб қўйилди. Вашингтон Эрон ҳукуматининг мамлакатда бошланган норозиликлар туфайли интернетни ўчириб қўйганини кескин қоралади ва намойишчилар томонида эканлигини маълум қилди. Эрон бензин нархи ошгани туфайли моддий зарар кўрган аҳолига кўрилган зарарни қоплаш учун субсидиялар ажратган. Эрон олий етакчиси Али Хоманаий мамлакатда бензин нархининг ошиши сабаб бошланган халқ норозиликларини хориждаги душманларнинг фитнаси деб атаган. Эрон президенти Ҳасан Руҳоний эса ушбу норозилик намойишлари ортида мақсади мамлакат хавфсизлигига таҳдид қилиш бўлган АҚШ ҳамда Исроил турганини тахмин қилган.
Кейинчалик Эроннинг 21 та шаҳридаги норозилик намойишларида қурбон бўлганларнинг сони 106 нафарга етгани, Эрондаги норозилик намойишлари вақтида полиция қўлга туширган безорилар ўт қўйилган ҳар бир бино учун 60 АҚШ доллари миқдорида мукофотга эга бўлганини тан олган. АҚШ намойишлар вақтида интернет ўчирилгани учун Эрон алоқа вазирига нисбатан санкция қўллаган. Эрон вице-президенти Исхоқ Жаҳонгирий Яқин Шарқ минтақасидаги мамлакатларнинг мамлакатдаги норозилик намойишларида иштирок этгани аниқланса, уларга «қақшатқич зарба» берилишини ваъда қилган. АҚШ давлат департаменти эса Facebook ва Twitter’ни Эрон ҳукумати вакилларининг аккаунтларини блоклашга чақирган.
