Туркманистон президенти Гурбангули Бердимуҳамедовга Ўзбекистон Фанлар академиясининг фахрий академиги унвони берилди. Унвонни топширишга бағишланган тантанали маросим 28 ноябрь, пайшанба куни бўлиб ўтди. Бу ҳақда Президент матбуот хизмати хабар берди.
Маълум қилинишича, Ўзбекистон Фанлар академияси ушбу қарорни Туркманистон президенти халқаро илмий доираларда кенг танилган ва эътироф этилган олим, замонавий тиббиёт, фармакология, иқтисодиёт, архитектура ва фаннинг бошқа соҳаларини ривожлантириш ҳамда Марказий Осиёнинг бой табиатини ўрганишга бағишланган қатор илмий қомусий асарлар муаллифи эканлигини инобатга олган ҳолда қабул қилди.
Маросимда Ўзбекистон Президенти Шавкат Мирзиёев сўзга чиқиб, ушбу қарор Туркманистон президентининг илм-фан соҳаларини ривожлантириш, қардош ўзбек ва туркман халқлари ўртасидаги дўстликни мустаҳкамлашдаги хизматларига улкан ҳурмат ифодаси эканини таъкидлади.
Туркманистон президентининг аждодлар маънавий мероси ва фундаментал илмий изланишларга асосланган кўп сонли илмий асарлари бугунги фан, маданият ва санъат ривожига муносиб ҳисса қўшди, дейилади хабарда.
Ўзбекистон Президенти охирги йиллар кўп асрлик алоқалар тарихида алоҳида аҳамиятга эга бўлгани ва бугунги кунда Стратегик шериклик тўғрисидаги шартнома асосида тобора ривожланаётганини қайд этди.
Қайд этилишича, Тошкент шаҳрида «Ашхобод» боғининг очилгани, пойтахтнинг марказий кўчаларидан бирига туркман халқининг буюк шоири ва мутафаккири Маҳтумқули Фироғий номи берилгани, Хоразмда «Улли Ҳовли» Ўзбекистон—Туркманистон туризм мажмуаси ташкил этилгани халқлар ўртасидаги дўстлик ришталари тобора мустаҳкамланиб бораётганига ёрқин мисолдир.
Туркманистон президенти Гурбангули Бердимуҳамедов, ўз навбатида, Президент Шавкат Мирзиёев ва Ўзбекистон Фанлар академиясига кўрсатилган юксак эътибор учун чуқур миннатдорлик билдирди, бу Туркманистонга ҳурмат-эҳтиром ифодаси, мамлакатнинг фан ва таълим соҳаларидаги ютуқлари эътирофи, халқлар ўртасидаги дўстлик мустаҳкамлигидан далолат эканини таъкидлади.
Туркманистон раҳбари кўп асрлик тарихий-маданий алоқалар боғлаб турган мамлакатларнинг яхши қўшничиликка асосланган ҳамкорлиги ўзаро манфаатларга ҳам, бутун минтақа фаровонлиги йўлидаги мақсадларга ҳам мос эканини қайд этди.
Гурбангули Бердимуҳамедов Президент Шавкат Мирзиёевнинг икки давлат ўртасидаги кўп қиррали шерикликни мустаҳкамлаш, унга янги суръат бағишлашга қўшган шахсий ҳиссасини юксак баҳолади. Ўзбекистон раҳбари билан мунтазам ва самарали учрашувлар доимо дўстона ва ишонч руҳида ўтаётгани ва аниқ келишувларга эришишга хизмат қилаётгани қайд этилди.
Тадбирда илм-фан ва маданият намояндалари, Ўзбекистонда истиқомат қилаётган туркман миллати вакиллари сўзга чиқиб, Туркманистон президентини юксак унвон билан табриклади.
Мавзуга доир: Шавкат Мирзиёев Туркманистон президентини қабул қилди
Изоҳ (0)