Davlat organlaridan kelgan murojaatlar sababli 2019-yil 1-dekabrdan boshlab “OLX.uz” xizmatida massaj reklamasi to‘xtatiladi. Bu haqda “OLX.uz” xizmati o‘z saytida ma’lum qildi.
Xizmat foydalanuvchilardan tugash sanasi 2019-yil 30-noyabrdan keyin bo‘lgan pulli xizmatlarini qo‘llamaslikni so‘ragan. Shuningdek, akkauntlarning bloklanib qolmasligi uchun foydalanuvchilardan 30-noyabr kuni massaj xizmatlari haqidagi e’lonlarni mustaqil ravishda o‘chirish so‘ralgan. Mazkur sanada o‘chirilmagan e’lonlar akkauntning blokdan chiqarilishiga imkon bermaydi.
Xizmat tomonidan ma’lum qilinishicha, agar foydalanuvchi 30-noyabrdan keyin tugaydigan pulli xizmatni qo‘llagan bo‘lsa, u “OLX.uz” ma’muriyatiga qayta aloqa shakli orqali murojaat qilishi mumkin. Shundagina pulli xizmat bekor qilinadi va ishlanmagan vaqt uchun mablag‘lar foydalanuvchining “OLX.uz”dagi shaxsiy kabinetiga qaytariladi.
Shaxsiy kabinetda qolgan pul mablag‘larini plastik kartaga qaytarish uchun foydalanuvchi qayta aloqa shakli orqali bog‘lanib, karta raqami, ism-familiya va kartaga biriktirilgan telefon raqamini ma’lum qilishi kerak.
Xizmat foydalanuvchiga pul mablag‘larini u tomonidan saytda e’lon joylashtirish qoidalari buzilmagan bo‘lsa, qaytarib beradi. Buning uchun foydalanuvchi 28-noyabrgacha murojaat qilishi kerak. Soliq hisobotlari sababli, bu sanadan keyin murojaat qilingan taqdirda, pul mablag‘larini qaytarishning imkoni bo‘lmaydi.
Foydalanuvchi tomonidan massaj haqidagi e’lonlarda shaxsiy, soxta, intim suratlar joylashtirilgan bo‘lsa, akkaunt blokdan chiqarilmaydi va pul mablag‘lari qaytarilmaydi. Shuningdek, foydalanuvchiga ogohlantirish berilib, e’loni qaytarilgan bo‘lsa, shuningdek, e’lon qaytarilmasdan, surat o‘chirilgan bo‘lsa ham, uning akkaunti bloklangan holda qoladi va puli qaytarib berilmaydi.
2019-yil 1-dekabrdan massaj xizmatlari haqidagi barcha e’lonlar va akkauntlar avtomatik tarzda blokirovka qilinadi. Akkauntlar qayta tiklanmaydi va pul mablag‘lari qaytarilmaydi.
Izoh (0)