Қашқадарёдаги метан «заправка»ларда ҳам турнақатор навбат юзага келди. Бу ҳақда «Дарё»га шикоят қилган ҳайдовчиларнинг маълумот беришича, газ қуйиш шохобчаларидаги навбатларнинг юзага келиши аксарият шохобчаларнинг фаолият юритмаётгани билан боғлиқ.
«Республикадан текширув келибди, шу боисдан ҳам ҳужжатида камчилиги бўлган «заправка»лар ёпиб қўйилган, — дейди ҳайдовчилар. — Бу эса бизга муаммо туғдиряпти. Соатлаб навбатда туришга мажбур бўляпмиз. Бу ёқда эса иш қолиб кетяпти».
«Ҳудудгаз Қашқадарё» МЧЖ масъулларининг ҳолатни изоҳлашича, бу одатий текширув. Республикадан текширув келди деган гап асоссиз.
«Ҳар 3 ой ёки 4 ойда ҳар бир метан «заправка» «Ҳудудгаз Қашқадарё» МЧЖ томонидан назоратдан ўтказилади, — дейди вилоят газ идораси ходими Беҳруз Шавкатов. — Ўша назорат пайтида камчиликка йўл қўйган ёки қарздорлиги кўпайган газ қуйиш шохобчалари фаолияти тўхтатилади».
Беҳруз Шавкатовнинг маълумот беришича, вилоятда айни кунда 59 та метан газ қуювчи шохобча мавжуд бўлиб, текширув пайтида ишида камчилик мавжуд бўлган иккита газ қуйиш шохобчаси фаолияти тўхтатилган. Қолган 57 та «заправка» фаолиятида муаммо йўқ.
Мутасаддининг айтишича, вилоятдаги метан газ қуйиш шохобчаларига ўзларининг талабидан келиб чиққан ҳолда ойлик лимит берилади.
Маълум қилинишича, вилоятдаги энг катта метан газ шохобчаси ойига 1,1 миллион куб метр газ сотиб олса, энг кичиги 100 минг куб газ харид қилади. Ҳар бир «заправка» харидорларининг эҳтиёжидан келиб чиққан ҳолда газ олади ва сотади. Автомобилларга газ қуйиш шохобчаларига газ етказиб беришда муаммо мавжуд эмас.
Эслатиб ўтамиз, аввалроқ Фарғона вилоятида метан газ олиш учун навбат 2 километрга етгани хусусида хабар берилганди. Сирдарёда эса метан газ қуйиш шохобчаси газ бермаётганидан норози ҳайдовчилар «Тошкент—Гулистон« автомобиль йўлини ёпиб қўйган эди. Нукусда одамлар ҳудудни табиий газ билан таъминлаб беришни талаб қилиб, норозилик намойиши ўтказди.
Изоҳ (0)