Лондонда UzInvest йирик инвестицион форуми бўлиб ўтмоқда
Ўзбекистон салоҳиятини намоён этиш ва инвесторларни жалб этиш мақсадида 27 ноябрь, чоршанба куни Лондонда халқаро UzInvest форуми бўлиб ўтмоқда.
УзИнвест форуми Ўзбекистон Инвестициялар ва ташқи савдо вазирлиги билан ҳамкорликда Adam Smith Conferences ва Eurasian Investor каби Лондон компаниялари томонидан ташкил этилди. Унда Европа инвесторлари ва бизнес соҳа вакиллари иштирок этмоқда.
Форумда шунингдек, йирик амалдор ва сиёсатчилар, хусусан, Инвестициялар ва ташқи савдо вазири ўринбосари Лазиз Қудратов, Молия вазири ўринбосари Одилбек Исоқов, Капитал бозорини ривожлантириш агентлиги директори Отабек Назиров, Давлат активларини бошқариш агентлиги директори Суннатилла Бекеновдан ташкил топган Ўзбекистон делегацияси иштирок этмоқда.
Adam Smith Conferences’нинг янги бизнесни кузатиш ва ривожлантириш бўйича директори Айса Апак ушбу форумни «Давосдаги Бутунжаҳон иқтисодий форумининг ўзбекча эквиваленти» дея баҳолади.
«Korzinka.uz» бош директори, Ўзбекистондаги истеъмол маҳсулотларининг замонавий чакана савдоси асосчиси Зафар Ҳошимов Ўзбекистондаги хусусий секторнинг ўсиш динамикаси ва тадбиркорликка нисбатан ошиб бораётган эътибор ва қизиқиш ҳақидаги маърузаси билан чиқиш қилади. Шунингдек, ушбу форум давомида Universal Bank кенгаши раиси Анвар Ирчаев, Silk Capital бошқарувчи директори Сардор Қўшназаров, Cambridge Learning Centers раҳбари Жаҳонгир Пўлатов, Khan Academy Uzbekistan лойиҳаси ҳамасосчиси Умиджон Ишмуҳаммедов ҳамда Home Show бренди асосчиси Азиз Нуриддинов чиқиш қилади.
Eurasian Investor асосчиси Эсфандияр Батманхелиж UzInvest форумининг ўтказилиши Ўзбекистондаги иқтисодий ислоҳотларнинг биринчи босқичининг якуни ва аллақачон бошланиши керак бўлган кейинги босқичнинг ўта муҳим бошланиши эканлигини айтиб ўтган.
«Европалик трансмиллий компания ва инвесторлар учун имкониятлар аниқ ва равшан — Ўзбекистон дастлабки кирувчиларга барқарор даромад ўсиши ва узоқ йиллик фойдани таклиф этмоқда. Шу билан бирга иқтисодий ислоҳотларнинг иккинчи босқичига ўтиш учун ушбу давлатдаги хорижий компания ва инвесторлар доирасини янада кенгайтириш талаб этилади. Биз эса айнан шу иккинчи босқични йўлга қўйишга ёрдам бермоқчимиз», — дея таъкидлаган Эсфандияр Батманхелиж.
UzInvest форуми ҳамкорларидан бири, Sturgeon Capital London investitsion компанияси бош директори Киян Зандие инвесторларнинг Ўзбекистонга қизиқиши ортаётганини билдирди.
«Инвесторлар ҳозирда мавжуд савдо-сотиқ йўналишларининг камлиги, юқори иқтисодий ислоҳотларни кўзлаган лойиҳа яратилганлиги ва ўзига хос макродинамика натижасида кучли иқтисодий ўсишга эришиш мумкинлигига аҳамият қаратишмоқда. Ўтган йили ҳам бу мамлакатга қизиқишнинг ўсиши кузатилганди. Бундан кейин ҳам Ўзбекистон яратиши мумкин бўлган қатор имкониятлар сабабли бу қизиқишлар ошиб боришини тахмин қиляпмиз», — дейди Киян Зандие.
UzInvest форуми шаҳарнинг молиявий марказидан узоқ бўлмаган Лондон кўприги яқинидаги тарихий жой Glaziers Hall’да бўлиб ўтмоқда. Ушбу форум Adam Smith Conferences ва Eurasian Investor томонидан Ўзбекистондаги иқтисодий ўсишни ривожлантиришни қўллаб-қувватлаш ва инвестицияларни жалб қилишга қаратилган тадбирларнинг дастлабкисидир.
