Ҳафта давомида республика ҳудудида ёмғир, қор ёғиши ва совуқ ҳаво ҳарорати кутилмоқда. Бу эса автомобиль йўлларида музламалар ҳосил бўлишига олиб келади. Шу муносабат билан Тошкент вилояти ИИББ Йўл ҳаракати хавфсизлиги хизмати тоғли ҳудудларга йўл олган ҳайдовчиларга мурожаат қилди.
Қайд этилишича, довон йўлида ҳаракатланадиган ҳар қандай транспорт воситаси энг аввало техник соз бўлиши лозим. Бунда шиналар ва иситиш мосламаси, рул бошқаруви ҳамда тормоз тизимларига алоҳида эътибор берилиши зарур. Довон томон йўлга отланган ҳайдовчилардан ўзлари ва ўзгаларнинг хавфсизлиги учун ушбу қоидаларни унутмаслик эслатиб ўтилган.
ИИББ томонидан таъкидланишича, қишки вақтда Бўстонлиқ, Паркент, Ангрен туманларида, хусусан, Чимён тоғ ёнбағирларида транспортлар қатнови кўпаяди. Бу ўз навбатида ҳаракатланиш хавфсизлигини таъминлаш йўналишидаги ишлар самарадорлигини оширишни талаб этади.
Қайд этилишича, тепаликка чиқа олмаётган аксарият автомобиллар қиш мавсумига тайёрланмаган бўлади. Кўпчилик ҳайдовчилар ёзги шиналарни ҳали қишкисига алмаштирмаган. Айрим машиналарнинг шиналари эса хизмат қилиш муддатини ўтаб бўлган. Бу эса тоғли йўлда, қор ёғганда маълум қийинчиликларни, муаммоларни келтириб чиқаради.
Тошкент вилояти ИИББ ЙҲХБ «Чинор» мунтазам йўл-патрул хизмати маскани довон йўлида жойлашган. Масканда хизмат олиб бораётган ходимлар бу ердан ўтаётган транспорт воситаларининг ҳайдовчилари билан суҳбатлар ўтказиб, довонда ҳаракатланиш тартибларини тушунтириб бормоқда. Суҳбатларда алоҳида эътибор юк автомобилларига қаратилмоқда. Чунки довон йўлидан тунги вақтларда юк автомобиллари кўп ҳаракатланади, дейилади ИИББ хабарида.
Изоҳ (0)