Вазирлар Маҳкамасининг 2019 йил 21 ноябрдаги қарорига асосан Ўзбекистон Республикаси Миллий гвардияси томонидан қўриқланадиган объектлар рўйхати тасдиқланди. Бу ҳақда Миллий гвардия томонидан маълум қилинди.
Хабар берилишича, қарорни қабул қилишда жисмоний ва юридик шахслар мулкини, жамиятнинг барқарор ривожланиши учун ижтимоий-иқтисодий аҳамиятга эга бўлган объектларни ишончли қўриқлашни таъминлашда ягона тамойил ва ёндашувлар жорий этиш ҳисобга олинган.
Шунингдек, қўриқлаш фаолиятини янада такомиллаштириш, қўриқлаш хизматларини кўрсатиш сифатини ошириш мақсадида мазкур қарор қабул қилинган.
Қарор билан тасдиқланган рўйхатдан Миллий гвардия қўриқлаш хизматлари соф бўлинмалари томонидан қўриқланадиган объектлар ҳамда қўриқлаш воситалари мониторинг ва назорат марказлари томонидан техник қўриқлаш воситалари ёрдамида қўриқланадиган объектлар жой олган.
Ушбу рўйхат Ўзбекистон Республикаси Президенти давлат хавфсизлик хизмати, Мудофаа вазирлиги, Ички ишлар вазирлиги, Фавқулодда вазиятлар вазирлиги, Давлат хавфсизлик хизмати ваколатлари доирасида қўриқланадиган объектларга татбиқ қилинмайди.
Изоҳ (0)