Hafta davomida respublika hududida yomg‘ir, qor yog‘ishi va sovuq havo harorati kutilmoqda. Bu esa avtomobil yo‘llarida muzlamalar hosil bo‘lishiga olib keladi. Shu munosabat bilan Toshkent viloyati IIBB Yo‘l harakati xavfsizligi xizmati tog‘li hududlarga yo‘l olgan haydovchilarga murojaat qildi.
Qayd etilishicha, dovon yo‘lida harakatlanadigan har qanday transport vositasi eng avvalo texnik soz bo‘lishi lozim. Bunda shinalar va isitish moslamasi, rul boshqaruvi hamda tormoz tizimlariga alohida e’tibor berilishi zarur. Dovon tomon yo‘lga otlangan haydovchilardan o‘zlari va o‘zgalarning xavfsizligi uchun ushbu qoidalarni unutmaslik eslatib o‘tilgan.
IIBB tomonidan ta’kidlanishicha, qishki vaqtda Bo‘stonliq, Parkent, Angren tumanlarida, xususan, Chimyon tog‘ yonbag‘irlarida transportlar qatnovi ko‘payadi. Bu o‘z navbatida harakatlanish xavfsizligini ta’minlash yo‘nalishidagi ishlar samaradorligini oshirishni talab etadi.
Qayd etilishicha, tepalikka chiqa olmayotgan aksariyat avtomobillar qish mavsumiga tayyorlanmagan bo‘ladi. Ko‘pchilik haydovchilar yozgi shinalarni hali qishkisiga almashtirmagan. Ayrim mashinalarning shinalari esa xizmat qilish muddatini o‘tab bo‘lgan. Bu esa tog‘li yo‘lda, qor yog‘ganda ma’lum qiyinchiliklarni, muammolarni keltirib chiqaradi.
Toshkent viloyati IIBB YHXB “Chinor” muntazam yo‘l-patrul xizmati maskani dovon yo‘lida joylashgan. Maskanda xizmat olib borayotgan xodimlar bu yerdan o‘tayotgan transport vositalarining haydovchilari bilan suhbatlar o‘tkazib, dovonda harakatlanish tartiblarini tushuntirib bormoqda. Suhbatlarda alohida e’tibor yuk avtomobillariga qaratilmoqda. Chunki dovon yo‘lidan tungi vaqtlarda yuk avtomobillari ko‘p harakatlanadi, deyiladi IIBB xabarida.
Izoh (0)