Теҳронда норозилик намойишларидан кейин ҳукуматни қўллаб-қувватлашга қаратилган митинг ўтказилди

25 ноябрь, душанба куни Теҳронда Эронда бўлиб ўтган халқнинг норозилик намойишларидан кейин ҳукуматни қўллаб-қувватлашга қаратилган катта митинг ўтказилди. Бу ҳақда «РИА Новости» хабар берди.

Ўтган ҳафтада Эроннинг бир нечта шаҳарларида бензин нархининг кескин ошишига нисбатан норозилик намойишлари ўтказилган. Намойишларнинг айримлари тинчлик билан, баъзилари эса тажовузкор руҳда ўтиб, кўплаб бинолар ва банкларнинг ёқиб юборилиши ҳолатлари кузатилган. Норозиликлар вақтида иштирокчилар ва полициячилар сафида ҳалок бўлганлар ҳам кузатилган. Эрон президенти Ҳасан Руҳоний ушбу намойишларнинг АҚШ томонидан ташкиллаштирилганини тахмин қилган.

Теҳрон душанбада ҳукуматни қўллаб-қувватловчи митинг ўтказилган ягона шаҳар эмас, бошқа ҳудудларда ҳам бу каби фитналарни ва намойишларни тугатиш талаб қилинган.

Теҳрон марказидаги Инқилоб майдони кўчалари транспорт қатновини тўхтатиш учун ёпиб қўйилди. Эрон ислом инқилоби ва олий етакчи Али Хамонаийни қўллаб-қувватловчи минглаб фуқаролар «Исроилга ўлим», «АҚШга ўлим» баннерлари билан ушбу давлатларни намойишлар ўтказишда иштирок этганликда айблади.

Митингда қатнашганлар Эрон ислом инқилоби муҳофизлари корпуси бошқарувчиси Ҳусайн Саломийнинг овозни баландлатувчи қурилмадан гапирган шиорларини такрорлаган. Саломий ўз нутқида мамлакат хавфсизлиги бирламчи аҳамият касб этиши, ўтказилган тадбир ҳам халқнинг фитна билан уюштирилган намойишларга бефарқ қараб турмаётганини англатишини таъкидлаган.

Аввал Эрон ҳукумати халқнинг норозилик намойиши ўтказишга ҳақи борлиги, бироқ ушбу норозиликни оломон уюштирадиган тартибсизлик ва тўполонлардан фарқланиши лозимлигини билдирган.

Эронда аҳолининг норозилик намойишлари 16 ноябрда ҳукуматнинг бензин нархини ошириш ҳақидаги қарорни имзолагани оқибатида бошланган. Эрон полицияси намойишчиларни тарқатиш учун уларга нисбатан ўқотар қуролдан фойдаланган. Норозиликлар туфайли 16 ноябрь куни Эронда интернет ўчириб қўйилди. Вашингтон Эрон ҳукуматининг мамлакатда бошланган норозиликлар туфайли интернетни ўчириб қўйганини кескин қоралади ва намойишчилар томонида эканлигини маълум қилди. Эрон бензин нархи ошгани туфайли моддий зарар кўрган аҳолига кўрилган зарарни қоплаш учун субсидиялар ажратган. Эрон олий етакчиси Али Хоманаий мамлакатда бензин нархининг ошиши сабаб бошланган халқ норозиликларини хориждаги душманларнинг фитнаси деб атаган. Эрон президенти Ҳасан Руҳоний эса ушбу норозилик намойишлари ортида мақсади мамлакат хавфсизлигига таҳдид қилиш бўлган АҚШ ҳамда Исроил турганини тахмин қилган.

Кейинчалик Эроннинг 21 та шаҳридаги норозилик намойишларида қурбон бўлганларнинг сони 106 нафарга етгани, Эрондаги норозилик намойишлари вақтида полиция қўлга туширган безорилар ўт қўйилган ҳар бир бино учун 60 АҚШ доллари миқдорида мукофотга эга бўлганини тан олган. АҚШ намойишлар вақтида интернет ўчирилгани учун Эрон алоқа вазирига нисбатан санкция қўллаган. Эрон вице-президенти Исхоқ Жаҳонгирий Яқин Шарқ минтақасидаги мамлакатларнинг мамлакатдаги норозилик намойишларида иштирок этгани аниқланса, уларга «қақшатқич зарба» берилишини ваъда қилган. АҚШ давлат департаменти эса Facebook ва Twitter’ни Эрон ҳукумати вакилларининг аккаунтларини блоклашга чақирган.