Ўзбекистонда давлат ихтисослаштирилган мактаб-интернатлари орасида биринчилардан бўлиб Наманганда тажриба тариқасида аутсорсинг тизими жорий этилди. Бу ҳақда «Дарё»га вилоят халқ таълими бошқармаси ахборот хизмати маълум қилди.
Наманган шаҳридаги 3-давлат ихтисослаштирилган мактаб-интернатида «Муассасада соғлом овқатлантиришни аутсорсинг усулида ташкил этиш» мавзусида семинар ўтказилди. Мазкур таълим муассасасида Kids food sales МЧЖ билан ҳамкорликда тажриба тариқасида ўқувчиларнинг аутсорсинг усулида соғлом овқатлантирилиши йўлга қўйилди.
Вилоятдаги барча 20 та давлат ихтисослаштирилган мактаб-интернатлари, 8 та махсус мактаб-интернат директорлари ва хўжалик ишлари бўйича масъуллар қатнашган семинарда МЧЖ томонидан муассаса ошхонасининг жиҳозланиши, тайёр маҳсулот ва таомлар, озиқ-овқат маҳсулотларини омборда сақлаш бўйича намунавий кўргазма ташкил этилди.
ДИМИ ошхонасини жорий таъмирлаш, кондитер маҳсулотларини тайёрлаш ускунаси, гўшт майдалагич, замонавий музлатгич, блендер, 400 комплект идиш-товоқ анжомлари билан бойитиш учун тадбиркор Муҳаммаджон Азизов ўз ҳисобидан 80 миллион сўм йўналтирди. Мазкур фаолиятнинг йўлга қўйилиши билан ўқув даргоҳида 12 та янги иш ўринлари яратилди.
Ошхона бир пайтнинг ўзида 370 нафар ўқувчини овқатлантириш қувватига эга бўлди. Тайёрланган овқатлар сифатли, гигиена талабларига жавоб беради. Таомлар сифатли ва мазали, айни пайтда ҳар куни ҳар хил, яъни бир кун ўқувчиларга берилган таом ҳафтанинг бошқа куни такроран берилмайди. Таом сифатини назорат қилиш учун диэтолог ва технологлар ажратилган.
Тажриба тариқасидаги аутсорсинг усулида соғлом овқатлантиришни йўлга қўйиш бўйича таълим муассасасининг келгусидаги фаолиятига қараб вилоятдаги барча давлат ихтисослаштирилган мактаб-интернат ва махсус мактаб-интернатларида босқичма-босқич шундай усулни жорий этиш режалаштирилди.
Изоҳ (0)