O‘zbekistonda davlat ixtisoslashtirilgan maktab-internatlari orasida birinchilardan bo‘lib Namanganda tajriba tariqasida autsorsing tizimi joriy etildi. Bu haqda “Daryo”ga viloyat xalq ta’limi boshqarmasi axborot xizmati ma’lum qildi.
Namangan shahridagi 3-davlat ixtisoslashtirilgan maktab-internatida “Muassasada sog‘lom ovqatlantirishni autsorsing usulida tashkil etish” mavzusida seminar o‘tkazildi. Mazkur ta’lim muassasasida Kids food sales MChJ bilan hamkorlikda tajriba tariqasida o‘quvchilarning autsorsing usulida sog‘lom ovqatlantirilishi yo‘lga qo‘yildi.
Viloyatdagi barcha 20 ta davlat ixtisoslashtirilgan maktab-internatlari, 8 ta maxsus maktab-internat direktorlari va xo‘jalik ishlari bo‘yicha mas’ullar qatnashgan seminarda MChJ tomonidan muassasa oshxonasining jihozlanishi, tayyor mahsulot va taomlar, oziq-ovqat mahsulotlarini omborda saqlash bo‘yicha namunaviy ko‘rgazma tashkil etildi.
DIMI oshxonasini joriy ta’mirlash, konditer mahsulotlarini tayyorlash uskunasi, go‘sht maydalagich, zamonaviy muzlatgich, blender, 400 komplekt idish-tovoq anjomlari bilan boyitish uchun tadbirkor Muhammadjon Azizov o‘z hisobidan 80 million so‘m yo‘naltirdi. Mazkur faoliyatning yo‘lga qo‘yilishi bilan o‘quv dargohida 12 ta yangi ish o‘rinlari yaratildi.
Oshxona bir paytning o‘zida 370 nafar o‘quvchini ovqatlantirish quvvatiga ega bo‘ldi. Tayyorlangan ovqatlar sifatli, gigiyena talablariga javob beradi. Taomlar sifatli va mazali, ayni paytda har kuni har xil, ya’ni bir kun o‘quvchilarga berilgan taom haftaning boshqa kuni takroran berilmaydi. Taom sifatini nazorat qilish uchun dietolog va texnologlar ajratilgan.
Tajriba tariqasidagi autsorsing usulida sog‘lom ovqatlantirishni yo‘lga qo‘yish bo‘yicha ta’lim muassasasining kelgusidagi faoliyatiga qarab viloyatdagi barcha davlat ixtisoslashtirilgan maktab-internat va maxsus maktab-internatlarida bosqichma-bosqich shunday usulni joriy etish rejalashtirildi.
Izoh (0)