Ломбардия провинцияси губернатори Аттилио Фонтана бошчилигидаги Италия делегацияси ташрифи доирасида Тошкентда Ўзбекистон—Италия бизнес-форуми бўлиб ўтди. Бу ҳақда Инвестициялар ва ташқи савдо вазирлиги матбуот хизмати маълум қилди.
Форумни Инвестициялар ва ташқи савдо вазири Сардор Умрзоқов очиб, ушбу даражадаги тадбирларнинг ўтказилиши инвестиция, савдо-иқтисодий ва банк соҳаларида икки томонлама ҳамкорликнинг муҳимлигини таъкидлади.
Ломбардия губернатори Аттилио Фонтана иқтисодий алоқаларни янада мустаҳкамлашда ҳар томонлама ёрдам кўрсатишга тайёрлигини билдирди. Ўзбекистон билан ҳамкорликка доимий қизиқиш билдираётган Ломбардия компаниялари орасида Maire Tecnimont, Mapei, Wood / Foster Wheeler, Asco Filtri, SI.SE, Marzoli, Pietro Fiorentini, Cannon / Bono, Plastics Technologies, In3act, General Med Merate ҳамда Unicredit Bank ва Banca Intesa San Paolo каби йирик банкларни кўрсатиш мумкин.
Форумда инвестиция ва саноат кооперацияси соҳасидаги имкониятлар кўриб чиқилди. Сўнгги 2 йил ичида Ўзбекистонда Италия капитали иштирокидаги корхоналар сони икки бараварга (46 тагача) ошди. Жорий йил бошидан буён 15 та корхона ташкил этилди, Италиянинг 7 компанияси аккредитациядан ўтди.
Ломбардия инвесторлари учун қишлоқ хўжалиги, автомобиль саноати ва бутловчи қисмларни ишлаб чиқариш, мева-сабзавот маҳсулотларини қайта ишлаш, кимё тармоғи, нефть ва газ саноати, тўқимачилик, ипак ва чарм-поябзал саноати, қурилиш материаллари ишлаб чиқариш соҳаси, фармацевтика, металлургия, шунингдек, бошқа йўналишларда муҳим истиқболлар қайд этилди.
Шунингдек, форум давомида мавжуд савдо-иқтисодий шароитлар ва бозор хусусиятларини ҳисобга олган ҳолда, бугунги кунда ўзаро савдо ҳажмини йилига 500 миллион долларгача ошириш имконияти мавжудлиги маълум қилинди.
Маълумот учун, Ломбардия Италиянинг шимолий қисмидаги маъмурий ҳудуд бўлиб, бу ерда мамлакат аҳолисининг 1/6 қисми (10 миллион киши) истиқомат қилади. Ломбардия ялпи ҳудудий маҳсулоти Италия жами ЯИМининг 20 фоизини, яъни 400 миллиард еврони ташкил этади.
Изоҳ (0)