22 ноябрь, жума куни Санкт-Петербург шаҳридаги Таврия саройида МДҲ Парламентлараро ассамблеясининг 50-ялпи мажлиси бўлиб ўтди. Унда 11 та модел қонун ҳужжати қабул қилинди. Тадбир якунлари бўйича матбуот анжумани ўтказилди. Бу ҳақда Сенат матбуот хизмати маълум қилди.
Ялпи мажлисда Ўзбекистон парламенти аъзолари делегацияси номидан Олий Мажлиси Сенати раиси Танзила Норбоева сўзга чиқди.
Т.Норбоева таъкидлаганидек, Ўзбекистон Парламентлараро Ассамблеяни муҳим парламентлараро бирлашмалардан бири деб ҳисоблаб, унда ўз аъзолигини тиклади, бу эса мазкур бирлашма иштирокчи мамлакатлари парламентлари ўртасидаги муносабатларда янги саҳифа очди. Республиканинг бошқа давлатлар билан кўп томонлама ва самарали ҳамкорлиги, шу жумладан, парламент алоқалари сезиларли даражада кенгайиб бормоқда.
Сенат раиси МДҲ ПА иштирокчи давлатлар парламентлари олдига қўйилган ҳамда хавфсизликни таъминлашга, барқарор ривожлантиришга ва халқлар равнақига қаратилган вазифаларни амалга ошириш учун ноёб майдон эканини таъкидлади.
ПА вазифаларини бажариш мақсадида ишларни биргаликда давом эттиришга тайёрлик билдирилди. Парламентлараро Ассамблеянинг кун тартиби ҳар доим ҳам анча кенг қамровли бўлиши, кўриб чиқилаётган масалалар эса барча мамлакатлар учун долзарб аҳамият касб этиши, шунингдек, улар мазкур мамлакатлар қонунчилик базасини такомиллаштиришга, парламент аъзолари ўртасида тажриба алмашишга, ПА халқаро нуфузини янада оширишга кўмаклашиши таъкидланди.
Шуни ҳисобга олган ҳолда Ўзбекистон МДҲ Парламентлараро Ассамблея доирасида долзарб муаммоларни ўз вақтида ҳал қилиш, ўзаро ишонч ва англашувни мустаҳкамлаш, мамлакатлар ўртасидаги амалий ҳамкорликни кенгайтириш учун ўз олдига аниқ мақсадларни қўйиши қайд этилди.
Ёшлар ҳаракати, туризм, экология, ахборот технологияларини ривожлантириш ва бошқа масалаларни амалга ошириш бўйича ПАнинг модел қонун ҳужжатларини, ташаббусларини шакллантириш амалиёти қўллаб-қувватланиши билдирилди.
Ўзбекистон 2020 йилда Ҳамдўстликда раисликни қабул қилишга ва МДҲнинг навбатдаги саммитини ўтказишга тайёргарлик кўрмоқда. Бу борада шу йил октябрь ойида Ашхобод шаҳрида ўтказилган МДҲ саммитида Ўзбекистон белгилаб берган устуворликлар ҳисобга олинган ҳолда Раислик қилиш концепцияси ҳамда уни амалга ошириш бўйича тадбирлар режаси тайёрланди ва тасдиқланди.
Шу муносабат билан Танзила Норбаева Ўзбекистон МДҲда раислик қилиши доирасида ПАнинг мажлисларидан бирини мамлакатда ўтказишни таклиф қилди.
Изоҳ (0)