Навоий вилояти Кармана туманида яшовчи А.Й. фирибгарлик йўли билан фуқаро М.Ж.нинг 24 миллион сўм пулини олиб, уни ўз эҳтиёжлари учун ишлатиб юборди. Бу ҳақда «Севимли» телеканалининг «Замон» ахборот дастурида хабар берилди.
Маълум бўлишича, А.Й. ўзини М.Ж.га ички ишлар бошқармаси ходими Феруз Раҳматов деб таништирган. Танишувдан 6—7 ой ўтгач, сохта ИИБ ходими аёлга унга уйланишини, бир ўғли ва бир қизи борлигини, рафиқаси вафот этганини ва айни пайтда эса унга бетоб қизи учун пул кераклигини айтган.
Аёл эса уй олиши кераклигини айтганда, А.Й. уй масаласини ўзи ҳал қилиб беришини айтган. М.Ж. сохта ИИБ ходимига 24 миллион сўм берган. Кейинроқ ўзининг алданиб қолганини тушунгач, ички ишлар идораларига мурожаат қилган.
А.Й.га нисбатан олиб борилган тергов давомида у Кармана туманида турмуш ўртоғи ва икки нафар фарзанди билан яшаши, шунингдек, унинг ИИБ ходими эмас, балки Навоий шаҳридаги Mustang автомобилларга хизмат кўрсатиш марказида оддий ишчи сифатида ишлаши аниқланган.
А.Й.га нисбатан Жиноят кодексининг 168-моддаси (фирибгарлик) билан жиноят иши қўзғатилиб, унга нисбатан тергов ҳаракатлари олиб борилмоқда.
Изоҳ (0)