Тошкентдаги Инҳа университетида 21 ноябрь, пайшанба куни «Бир миллион дастурчиларни тайёрлаш» лойиҳасининг очилиш маросими бўлиб ўтди. Бу ҳақда «Дарё»га университет матбуот хизмати хабар берди.
Унда бош вазир Абдулла Арипов, Ахборот технологиялари ва коммуникацияларини ривожлантириш вазирининг биринчи ўринбосари Олимжон Умаров, Халқ таълими вазири Шерзод Шерматов, Ташқи савдо ва инвестициялар вазири Сардор Умрзоқов, БААнинг ҳукумат ва келажак ишлари бўйича вазири Муҳаммад бин Абдуллоҳ ал-Қарқовий, БАА сунъий интеллект технологиялари вазири Умар бин Султон ал-Олама ва бошқалар иштирок этди.
Маросимда сўзга чиққан Абдулла Арипов бугунги кунда замонавий Ўзбекистоннинг энг муҳим бойлиги бу инсон ресурслари эканлигини айтган.
«Бу ерда аҳолининг 60 фоизидан ортиғини ўртача ёши 29 ёшдан ошмайдиган ёшлар ташкил этади. Шу сабабли ёшларга оид давлат сиёсатида ўғил ва қизларимизнинг жамиятдаги мавқеини мустаҳкамлаш келажакнинг янги мутахассисликлари ва касбларни эгаллашлари биз учун ўта муҳимдир.Бу Ўзбекистон Президенти Шавкат Мирзиёев томонидан илгари сурилган ёшларни тарбиялаш ва таълим олишлари учун шарт-шароитлар яратишга қаратилган бешта ташаббусни амалга ошириш бўйича давлат дастурида акс этган», — деб таъкидлаган бош вазир.
Унинг сўзларига кўра, «Бир миллион дастурчи тайёрлаш» лойиҳасининг амалга оширилиши мамлакат аҳолисини кенг қатламлардаги янги ахборот технологиялар касбларини ўзлаштиришга жалб этиш, шунингдек, ёшларни, шу жумладан, имконияти чекланган шахсларни ишга жойлаштириш, дастурлаш бўйича бепул таълим бериш ва ўз-ўзини касбий ифода этишда янги имкониятлар яратади.
Маълумот учун, One Million Uzbek Coders лойиҳаси биринчи навбатда, маҳаллий аҳолига, асосан, ёшларга АТ мутахассисликларида арзон ва сифатли таълим олиш имкониятини беради. Таълим 4 та йўналиш бўйича амалга оширилади. Лойиҳа ишга туширилгандан сўнг иштирок этиш учун исталган киши ариза топшириши мумкин.
Изоҳ (0)