Toshkentdagi Inha universitetida 21-noyabr, payshanba kuni “Bir million dasturchilarni tayyorlash” loyihasining ochilish marosimi bo‘lib o‘tdi. Bu haqda “Daryo”ga universitet matbuot xizmati xabar berdi.
Unda bosh vazir Abdulla Aripov, Axborot texnologiyalari va kommunikatsiyalarini rivojlantirish vazirining birinchi o‘rinbosari Olimjon Umarov, Xalq ta’limi vaziri Sherzod Shermatov, Tashqi savdo va investitsiyalar vaziri Sardor Umrzoqov, BAAning hukumat va kelajak ishlari bo‘yicha vaziri Muhammad bin Abdulloh al-Qarqoviy, BAA sun’iy intellekt texnologiyalari vaziri Umar bin Sulton al-Olama va boshqalar ishtirok etdi.
Marosimda so‘zga chiqqan Abdulla Aripov bugungi kunda zamonaviy O‘zbekistonning eng muhim boyligi bu inson resurslari ekanligini aytgan.
Mavzuga doir: O‘zbekistonda dasturchilar uchun One Million Uzbek Coders bepul onlayn kurslari ochiladi
Bu O‘zbekiston Prezidenti Shavkat Mirziyoyev tomonidan ilgari surilgan yoshlarni tarbiyalash va ta’lim olishlari uchun shart-sharoitlar yaratishga qaratilgan beshta tashabbusni amalga oshirish bo‘yicha davlat dasturida aks etgan”, — deb ta’kidlagan bosh vazir.
Uning so‘zlariga ko‘ra, “Bir million dasturchi tayyorlash” loyihasining amalga oshirilishi mamlakat aholisini keng qatlamlardagi yangi axborot texnologiyalar kasblarini o‘zlashtirishga jalb etish, shuningdek, yoshlarni, shu jumladan, imkoniyati cheklangan shaxslarni ishga joylashtirish, dasturlash bo‘yicha bepul ta’lim berish va o‘z-o‘zini kasbiy ifoda etishda yangi imkoniyatlar yaratadi.
Ma’lumot uchun, One Million Uzbek Coders loyihasi birinchi navbatda, mahalliy aholiga, asosan, yoshlarga AT mutaxassisliklarida arzon va sifatli ta’lim olish imkoniyatini beradi. Ta’lim 4 ta yo‘nalish bo‘yicha amalga oshiriladi. Loyiha ishga tushirilgandan so‘ng ishtirok etish uchun istalgan kishi ariza topshirishi mumkin.
Izoh (0)