Россиянинг Свердловск вилояти губернатори Евгений Куйвашев бошчилигидаги делегация Наманганга келади. Бу ҳақда «Дарё» мухбири Азизбек Абдувалиев хабар бермоқда.
Свердловск делегацияси таркибидан губернатор ўринбосари, вазирлар, йирик компаниялар раҳбарлари, санъаткорлар, жами 70 киши ўрин олган.
24—26 ноябрь кунлари амалга ошириладиган сафар давомида Наманган ҳамда Свердловск вилоятлари ўртасида савдо-иқтисодий, илмий-техникавий, гуманитар ва бошқа соҳалардаги ҳамкорлик бўйича келишув имзоланади.
Наманган ва Свердловск ишбилармон доиралари вакилларининг B2B форматидаги учрашувлари бўлиб ўтади. Музокаралар якуни бўйича кўплаб келишувларга эришилиши кўзда тутилган.
Свердловск делегацияси Наманган давлат университетида ташкил этилган Урал давлат тиббиёт университети қўшма тиббиёт факультетига талабаликка қабул қилиш маросимида ҳам иштирок этади.
Маълумот учун, Наманган вилояти ҳокими Хайрулло Бозоров 2017 йил март ойида Свердовскка сафар қилган ва губернатор Куйвашев билан ҳудудлар ўртасида ҳамкорлик ўрнатиш бўйича баённома имзолаганди.
Изоҳ (0)