Тошкент шаҳар давлат солиқ хизмати органлари томонидан пойтахтнинг Бектемир туманида профилактик тадбирлар ўтказилди. Бу ҳақда Тошкент давлат солиқ бошқармаси матбуот хизмати «Дарё»га хабар берди.
Тадбирлар давомида Фарғона вилояти Марғилон шаҳрида яшовчи 1988 йилда туғилган фуқаро Нозима Шокирова (исм ва фамилиялар ўзгартирилган) ҳеч қандай ҳужжатларсиз пиротехника воситаларини савдога қўйгани аниқланди. Тадбир давомида 3 турдаги 333 дона (қути) умумий қиймати 8 миллион 910 минг сўмлик пиротехника маҳсулотлари ноқонуний савдосининг олди олинди.
Профилактик тадбирлар давомида Бектемир тумани Нурафшон кўчасида яшовчи, 1991 йилда туғилган яна бир фуқаро Улуғбек Умматов ҳам 3 турдаги 15 дона (қути) умумий баҳоси 800 минг сўмлик пиротехника воситаларини мўмай даромад эвазига пуллаш пайида бўлгани маълум бўлди.
Ҳудди шунингдек, Тошкент вилояти Оққўрғон туманида истиқомат қилувчи, 1998 йилда туғилган фуқаро Шодиёр Дониёров республикага ноқонуний йўллар билан олиб келинган 20 дона умумий қиймати 800 минг сўмлик пиротехника воситаларини ноқонуний савдога қўйгани аниқланди.
Эслатиб ўтамиз, Ўзбекистон Республикаси Маъмурий жавобгарлик тўғрисидаги кодекси ҳамда Жиноят кодексининг тегишли моддаларида пиротехника буюмларининг қонунга хилоф муомаласи учун жавобгарлик ва жазо чоралари белгиланган.
Изоҳ (0)