Тошкентда 19 апрелда имзоланган Ўзбекистон ва Корея Республикаси ҳукумати ўртасида инвестицияларни ўзаро рағбатлантириш ва ҳимоя қилиш тўғрисидаги битим Президент томонидан тасдиқланди.
Ушбу битим Жанубий Корея президенти Мун Чжэ Иннинг 18–19 апрель кунлари Ўзбекистонга расмий ташрифи давомида икки давлат ҳукуматлари раҳбарлари томонидан имзоланган эди.
Нормаънинг ёзишича, бундай ҳужжатларда, қоидага кўра, шартнома тарафлари инвестицияларини ҳар томонлама ҳуқуқий жиҳатдан ҳимоя қилиш, шу жумладан уларни экспроприация қилиш ёки миллийлаштиришни тақиқлаш, тўловларни ўтказишда эркинлик бериш, инвесторларга етказилган зарарни қоплаш ҳамда давлат ва инвесторлар ўртасидаги низоларни ҳал этиш тартиби назарда тутилади. Масалан, шунга ўхшаш битимларни Ўзбекистон Россия, Тожикистон, Қозоғистон, Хитой ва яна бир қатор давлатлар билан имзолаган.
Ўзбекистон ТИВ мазкур шартнома кучга кириши учун Ўзбекистон томонидан зарур бўлган давлат ички тартиб-таомиллари бажарилганлиги ҳамда уни амалга ошириш учун масъул бўлган ваколатли орган ҳақидаги тегишли билдиришномани Кореяга юборади.
Вазирлар Маҳкамаси ҳамда тегишли вазирлик ва идораларнинг раҳбарлари ушбу икки томонлама битим доирасида Ўзбекистоннинг мажбуриятлари бажарилиши устидан назоратни таъминлайди.
Изоҳ (0)