Бош прокуратура ҳузуридаги департаментнинг Арнасой туман бўлими томонидан ўтказилган терговга қадар текширувда жуда кўп миқдордаги солиқларни тўламаслик ҳолати аниқланди. Бу ҳақда Бош прокуратура матбуот хизмати «Дарё»га маълум қилди.
Аниқланишича, А.Қ.И. МЧЖ раҳбари О.П. жами 3,2 миллиард сўмлик савдодан тушган нақд пулларни назорат касса машинасига кирим қилмасдан, жуда кўп миқдордаги савдо ва хизмат кўрсатиш қоидаларини бузганлиги, ҳисоботларда товарларни реализация қилишдан тушган тушумларни кўрсатмасдан жами 339,5 миллион сўм солиқ ва бошқа мажбурий тўловларни тўлашдан қасддан бўйин товлаб келган.
Бундан ташқари, фуқаро О.П. М.А.Х. МЧЖ раҳбари сифатида фаолиятини давом эттириб, тижорат банклардан бирининг Жиззах минтақавий филиали мансабдор шахслари билан тил бириктириб, қишлоқ хўжалиги маҳсулотларини экспорт қилиш ҳақидаги кредит шартномасига сохта маълумотларни киритиб, 200 миллион сўм кредит маблағларини ўзлаштириш йўли билан талон-торож қилган.
Шунингдек, терговга қадар текширувда, фуқаро О.П. (1985 йилда туғилган) худди юқоридаги каби қилмиши, яъни солиқлар ёки бошқа мажбурий тўловларни тўлашдан бўйин товлаш ҳамда савдо ва хизмат кўрсатиш қоидаларини бузиш жиноятларини содир этганлиги учун суд ҳукми билан айбли деб топилганлиги маълум бўлган.
Мазкур ҳолат юзасидан А.Қ.И. ҳамда М.А.Х. МЧЖлар раҳбари О.П. ва банкнинг Жиззах минтақавий филиали мансабдор шахсларига нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)