«Kun.uz» 19 ноябрь куни Тошкент шаҳар ҳокими Жаҳонгир Ортиқхўжаев овози ёзилган аудионинг 14 дақиқадан ортиқ давом этадиган талқинини эълон қилган эди, ҳозир ўша аудио ўрнига 17 дақиқадан кўпроқ давом этадигани қўйилган. Унда, жумладан, сайт ишчиларининг икки-уч кунга бесабаб йўқолиб қолиши оқибатлари ва Олмазор тумани ҳокими собиқ ўринбосари Абдурасул Ваҳобовни охиригача, керак бўлса, Ортиқхўжаевнинг ўзи ишдан олиб ташлангунича ҳимоя қилиши ҳақидаги таъкидлар бор. «Kun.uz»нинг қўшимча қилишича, суҳбат аслида бир соатга яқин давом этган.
Деҳқонободдаги 43 йилдан буён электр токисиз фаолият юритган мактабга электр таъминоти ўтказилди. «Дарё»да эълон қилинган мақоладан сўнг. «Ҳудудий электр тармоқлари» компанияси бош-қошлигида. Компания қилинган иш ҳақида ҳисобот берибди-ю (электр улаб беришгани учун раҳмат, айтмоқчи), лекин кейин панд-насиҳатга ҳам ўтиб кетганмие: «Нима учун маҳаллий ҳокимлик вакиллари ёки халқ таълими бошқармаси қарийб ярим аср электр энергиясиз фаолият юритган мактабдаги бу вазиятга эътибор қаратмади?».
Ўзбекистонга импорт қилинадиган Chevrolet Trailblazer’нинг дастлабки суратлари пайдо бўлди. Ушбу автомобиль Ўзбекистон учун Таиландда ишлаб чиқарилган ва энг қиммат версияси 38 минг доллардан сотилиши кутилмоқда. Блогер Малик Каримовнинг қўшимча қилишича, UzAuto Motors нафақат аввал эълон қилинган Equinox, Trailblazer, Traverse моделларини, балки Chevrolet Tahoe’ни ҳам сотар эмиш.
Яна қандай янгиликлар? Ўзбекистон Марказий банки 2020 йилдан инфляцион таргетлаш режимига ўтишни бошлайди. Обеликс роли билан танилган француз актёри Жерар Депардье Қорақалпоғистонга етиб келди. Навоийда 9400 доллар пора олган мактаб директори қўлга олинди. Урганчдаги Ўзбекистон байроғи дунёда баландлиги бўйича 15-ўринни эгаллади. Россияликларнинг Ўзбекистондаги харажатлари бир йил ичида 50 миллион долларга ўсди. Бухоро, Самарқанд ва Навоий вилоятларида шамолдан энергия олувчи қурилмалар ўрнатилади. Эронда бензин нархи ошишига қарши норозилик намойишлари давомида 100 дан ортиқ одам ҳалок бўлди. Украина расмийлари америкалик подполковникка мамлакат мудофаа вазири лавозимини таклиф қилгани маълум қилинди.
Изоҳ (0)