Ўзбекистон футбол клублари 2021 йилдан ОФК миқёсидаги мусобақаларда яна битта қўшимча квотага эга бўлиши мумкин.
Қатарда фаолият юритаётган Алишер Никимбаевнинг хабар қилишича, яқин орада ОФК мусобақалар қўмитаси йиғилиши бўлиб ўтади. Бунинг натижасида Ўзбекистонга ОФК Кубоги мусобақасида битта ўрин ажратилиши мумкин.
«Эсингизда бўлса, ОФК ижроия қўмитасининг октябрь ойидаги йиғилишида Осиё Чемпионлар Лигасидаги иштирокчилар сони 2021 йилдан бошлаб 32 тадан 40 тага етказилиши маълум бўлганди. Ўз навбатида рейтингнинг дастлабки олти ўринидаги мамлакатларга қўшимча квота ажратилмаслиги белгиланганди. Ўзбекистон 2016—2019 йиллар якунига кўра, рейтингни 6-ўринда якунлаган ва Чемпионлар Лигаси гуруҳ босқичига битта ва плей-офф босқичига битта йўлланмага эга бўлганди.
Бироқ беш кундан сўнг ОФК мусобақалар қўмитаси юқорида таъкидланган олти мамлакатга биттадан квота беришни муҳокама қилади. Аммо бу квота Чемпионлар Лигасига эмас, балки, ОФК Кубогига йўлланма беради.
Шу билан бирга рейтингда 7—10 ўриндаги жамоаларга биттадан Чемпионлар Лигаси гуруҳ босқичига йўлланма тақдим этилади. Ғарб минтақасида бу қаторга Туркманистон ва Тожикистон ҳам киради. 2021 йил Марказий Осиё учун тарихий йил бўлиши мумкин. Қўмита қарорини кутиш қолди», — дея ёзмоқда Никимбаев.
Агар бу тасдиқланса Ўзбекистон 2021 ва 2022 йилларда ҳам Осиё миқёсидаги мусобақаларда учта клуб билан иштирок этади. Иккита ўрин (1+1) Чемпионлар Лигасида, яна битта ўрин ОФК Кубогида.
Эслатиб ўтамиз, 2019 ва 2020 йилги мавсумлар учун Ўзбекистон клублари Осиё Чемпионлар Лигаси мусобақасида «2+1» квотага эга (иккита гуруҳ босқичи ва битта плей-офф). Рейтингдаги пасайиш туфайли Ўзбекистонинг 2021—2022 йилги ОЧЛ мусобақаси учун квотаси «1+1»га тушиб қолганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)