Соғлиқни сақлаш вазирлиги томонидан ижтимоий тармоқларда тарқалган Тошкентда қассоблик билан шуғулланган фуқаро куйдирги касаллигидан ўлганлиги, ушбу касаллик билан зарарланган гўшт пойтахтдаги колбаса ишлаб чиқариш цехларига тарқатилгани, шу боис колбаса ва сосиска маҳсулотларини истеъмол қилмаслик лозимлиги ҳақидаги аудиоёзув ўрганиб чиқилди.
Маълум бўлишича, охирги ойларда вазирлик тасарруфидаги шифохоналарга куйдирги касаллиги аломатлари билан аҳоли томонидан ҳеч қандай мурожаатлар бўлмаган ва ўлим ҳолати умуман қайд этилмаган.
Вазирлик ҳузуридаги Санитария эпидемиологик осойишталик агентлиги директори Баҳром Алматовнинг қайд этишича, куйдирги касаллигини ташқи муҳитда (тупроқда) ўта чидамли бўлган бактерия қўзғатади. Ушбу касаллик асосан терида очиқ яралари бўлган инсон томонидан касалланган чорва молларини сўйиш жараёнида юқиши мумкин. Касаллик одамларда терида яра шаклида, ҳайвонларда эса септик шаклда учрайди. Мазкур касаллик ҳайвонлардан одамларга юқади, касал одамдан соғлом одамга юқмайди.
Қолаверса, юқори даражадаги ҳароратда ишлов берилган барча озиқ-овқат маҳсулотларида куйдирги касаллиги микроблари нобуд бўлиб, касаллик келтириб чиқариш хусусияти йўқолади. Яъни колбаса ва сосиска маҳсулотлари тайёрланиш жараёнида кучли термик ишловдан ўтказилиши натижасида гўшт маҳсулотидаги барча турдаги микроблар, жумладан, куйдирги қўзғатувчилари ҳам нобуд бўлади. Шу боис ҳам колбаса маҳсулотлари куйдирги касаллигини келтириб чиқармайди.
«Аҳолидан бу каби асосланмаган хабарларга, турли миш-мишларга ишонмасликларини, бу борада умуман хавотирга ўрин йўқ эканлигини таъкидламоқчимиз», — дейилади вазирлик хабарида.
Изоҳ (0)