Тошкент давлат юридик университети ҳузурида Юридик кадрларни халқаро стандартлар бўйича профессионал ўқитиш марказида олий маълумотга эга бўлган шахсларни юридик мутахассисликка қайта тайёрлаш курсига кириш имтиҳонлари бошланди. Бу ҳақда Адлия вазирлиги жамоатчилик билан алоқалар бўлими «Дарё»га маълум қилди.
Қайта тайёрлаш курсига кириш имтиҳонлари юридик касбни танлашнинг асослантирилиши, ҳуқуқ соҳасидаги таянч билимлар ва таҳлилий фикрлашни аниқлаш нуқтаи назаридан суҳбат асосида 22 ноябрга қадар икки сменада бўлиб ўтиши белгиланган.
Суҳбат адлия вазири ўринбосари – Тошкент давлат юридик университети ректори бошчилигидаги мазкур университет профессор-ўқитувчилар томонидан ўтказилмоқда. Имтиҳон жараёнларининг шаффоф, адолатли ва кенг жамоатчилик назорати остида ўтишини таъминлаш мақсадида суҳбат жараёни биринчи марта samera.telecomtv.uz сайти орқали онлайн трансляция қилиб борилмоқда.
Тошкент давлат юридик университети ҳузурида Юридик кадрларни халқаро стандартлар бўйича профессионал ўқитиш маркази Ўзбекистон Президентининг 2018 йил 13 апрелдаги «Ўзбекистон Республикаси Адлия вазирлиги фаолиятини янада такомиллаштиришга доир ташкилий чора-тадбирлар тўғрисида»ги қарорига асосан ташкил этилган. Ҳозирги кунда Марказда Олий маълумотга эга бўлган шахсларни юридик мутахассисликка қайта тайёрлаш курси фаолият олиб бормоқда.
Қайта тайёрлаш курси давлат органлари ва бошқа ташкилотларнинг юридик хизматларида фаолият олиб бориш учун етарли даражадаги билим олишни ва кўникма шакллантиришни назарда тутадиган олий таълимдан кейинги ўқитиш шакли ҳисобланади.
Ушбу қайта тайёрлаш курсига қабул квотаси 100 (75 ўзбек, 25 рус) та қилиб белгиланган. Ўқитиш тўлов-контракт асосида амалга оширилиб, бугунги кунда унинг миқдори 10 000 000 сўмни ташкил этади. Айни пайтда, 79 та мутахассислик бўйича олий маълумотга эга бўлган шахслар қайта тайёрлаш курсларига ҳужжат топширишлари мумкин.
Курсларга талабгорлардан ҳужжатларни қабул қилиш 2019 йил 2 октябрдан 31 октябрга қадар centertsul.uz ва qabul.centertsul.uz сайтлари орқали фақат электрон шаклда амалга оширилди.
Ушбу давр мобайнида 314 нафар (282 нафар ўзбек гуруҳига, 32 нафар рус гуруҳига) талабгор қайта тайёрлаш курсларига ўқишга кириш учун ҳужжат топширган. Суҳбат натижаларига кўра, қайта тайёрлаш ўқув курсларига қабул қилинган шахслар учун ўқув жараёни 2020 йил январь ойидан бошланади ва 6 ой давом этади.
Мазкур курсларни тугатган ва белгиланган намунадаги дипломни олган шахслар давлат органлари ва бошқа ташкилотларнинг юридик хизматларида ишлаш ҳуқуқига эга бўлади.
Изоҳ (0)