Самарқандда қувурни таъмирлаётган икки ишчи тупроқ босиб қолиши оқибатида ҳалок бўлганлиги ҳақида хабар берилганди. Мазкур воқеа юзасидан Самарқанд «Сувоқова» ДУК ўз муносабатини билдирди.
«Дарё» мухбирининг маълум қилишича, «Боғимирзо» маҳалласида яшовчи тадбиркор ўз ҳисобидан маҳалладаги тор йўлларни кенгайтириб, янги канализация тармоғини тортмоқчи бўлган. Тадбиркор Самарқанд шаҳридаги Садриддин Айний кўчасида жойлашган меҳнат бозоридан кунлик меҳнатга ҳақ тўлашини билдириб, бир гуруҳ ёлланма ишчиларни олиб келган.
13 ноябрь куни тахминан соат 11:30 атрофида тортилган канализация тармоғи марказий қудуқ (колодец)га уланиш жараёнига етганда бахтсиз ҳодиса юз берган. Эни 70 см, чуқурлиги 2 метр қазилган жойда тупроқ деворининг қулаши натижасида ёлланма ишчиларни тупроқ босиб қолган. Натижада чуқур ичида бўлган ёлланма ишчилар Қ.К ҳамда М.А. вафот этган.
«Тадбиркорнинг тармоққа уланиш учун ҳеч қандай ҳуқуқий асоси бўлмаган. Уланиш учун тегишли ҳужжатларни қилмаган. Қолаверса, техник шарт ҳисобга олинмаган. Барча қилинаётган ишлар тадбиркорнинг ҳисобидан амалга оширилган. Канализация тармоғи «Сувоқова» ДУКни бу воқеага ҳеч қандай алоқаси йўқ», — дейди Самарқанд «Сувоқова» ДУК директори Комилжон Юсупов.
Ижтимоий тармоқларда тарқалган хабарда ҳалок бўлган фуқароларнинг исм-фамилияси нотўғри кўрсатилган.
«Марҳумларнинг вафоти юзасидан олиб борилган экспертиза хулосасига кўра, қорин ва кўкрак қафасининг қисилишидан ўлим ҳолати юзага келган. Марҳумларнинг оила аъзоларидан ҳеч қандай шикоят йўқ. Мавжуд ҳолат қасддан қилинмаган», — дейди профилактика инспектори Шуҳрат Бекназаров.
Изоҳ (0)