Samarqandda quvurni ta’mirlayotgan ikki ishchi tuproq bosib qolishi oqibatida halok bo‘lganligi haqida xabar berilgandi. Mazkur voqea yuzasidan Samarqand “Suvoqova” DUK o‘z munosabatini bildirdi.
“Daryo” muxbirining ma’lum qilishicha, “Bog‘imirzo” mahallasida yashovchi tadbirkor o‘z hisobidan mahalladagi tor yo‘llarni kengaytirib, yangi kanalizatsiya tarmog‘ini tortmoqchi bo‘lgan. Tadbirkor Samarqand shahridagi Sadriddin Ayniy ko‘chasida joylashgan mehnat bozoridan kunlik mehnatga haq to‘lashini bildirib bir guruh yollanma ishchilarni olib kelgan.
13-noyabr kuni taxminan soat 11:30 atrofida tortilgan kanalizatsiya tarmog‘i markaziy quduq (kolodes)ga ulanish jarayoniga yetganda baxtsiz hodisa yuz bergan. Eni 70 sm, chuqurligi 2 metr qazilgan joyda tuproq devorining qulashi natijasida yollanma ishchilarni tuproq bosib qolgan. Natijada chuqur ichida bo‘lgan yollanma ishchilar Q.K hamda M.A. vafot etgan.
“Tadbirkorning tarmoqqa ulanish uchun hech qanday huquqiy asosi bo‘lmagan. Ulanish uchun tegishli hujjatlarni qilmagan. Qolaversa, texnik shart hisobga olinmagan. Barcha qilinayotgan ishlar tadbirkorning hisobidan amalga oshirilgan. Kanalizatsiya tarmog‘i “Suvoqova” DUKni bu voqeaga hech qanday aloqasi yo‘q”, — deydi Samarqand “Suvoqova” DUK direktori Komiljon Yusupov.
Ijtimoiy tarmoqlarda tarqalgan xabarda halok bo‘lgan fuqarolarning ism-familiyasi noto‘g‘ri ko‘rsatilgan.
“Marhumlarning vafoti yuzasidan olib borilgan ekspertiza xulosasiga ko‘ra, qorin va ko‘krak qafasining qisilishidan o‘lim holati yuzaga kelgan. Marhumlarning oila a’zolaridan hech qanday shikoyat yo‘q. Mavjud holat qasddan qilinmagan”, — deydi profilaktika inspektori Shuhrat Beknazarov.
Izoh (0)