Қашқадарёда солиқ идоралари томонидан ўтказилган 1120 та рейд тадбирлари давомида аниқланган 1 миллиард 235 миллион сўмлик ноқонуний товарлар далилий ашё сифатида олиб қўйилган. Бу ҳақда Қашқадарё вилояти давлат Солиқ бошқармасида ташкил этилган матбуот брифингида маълум қилинди, деб хабар беради «Дарё» мухбири.
Қашқадарё вилояти давлат Солиқ бошқарма бошлиғи биринчи ўринбосари Алишер Қодировнинг айтишича, айни кунда вилоятда мавжуд тадбиркорлик субъектлари сони 58 300 дан ортиқ.
«Минг афсуски қонуний фаолият юритаётган тадбиркорлар қатори фаолияти ноқонуний бўлган сохта тадбиркорлар ҳам йўқ эмас. Ўтказилган рейд тадбирларидан ана шундай сохта тадбиркорлардан бир миллиарддан ортиқ товар маҳсулотлари олиб қўйилган. 31 та ҳолатда ноқонуний аудивизуал маҳсулотлар сотаётган уддабуронлар аниқланган ва 52 миллион сўмлик товарлар олиб қўйилган», — дейди Алишер Қодиров.
Брифингда маълум қилинишича, Қарши шаҳрида ўтказилган назорат тадбирларида ноқонуний тадбиркорлик билан шуғулланган фуқаролар аниқланиб, улардан 29 миллион 700 минг сўмлик компьютер қурилмалари олиб қўйилган.
Фаолияти қонунийлаштирилган тадбиркорлик субъектлари томонидан жорий йил бошидан айни кунга қадар 61 минг 629 та янги иш ўринлари яратилган.
Изоҳ (0)