«Меҳр ва оқибат» ҳайвонларни ҳимоя қилиш жамияти аъзолари бензин қуйиб итни ёқиб юборган фуқаронинг шахсини аниқлашга ёрдам берганга 2 миллион сўм мукофот эълон қилди. Бу ҳақда жамият ўзининг Facebook’даги саҳифасида маълум қилди.
Унда айтилишича, ижтимоий тармоқларда эркакнинг вояга етмаган бола кўз ўнгида ўзининг овчарка зотли итининг устидан бензин қуйиб, ёқиб юборгани акс этган видео тарқалган. Оқибатда ит қийноқларда жон берган.
Қайд этилишича, гумонланувчининг исми Баҳодир бўлиб, уни бирон-бир манзил бўйича кўрганлардан +99897 455 41 12 рақамига қўнғироқ қилиб хабар бериш сўралган.
«Меҳр ва оқибат» жамияти итни ёқиб юборган эркакни топишга ёрдам берганга 2 миллион сўм миқдорида мукофот ваъда қилган. Унинг шахси аниқлангач, маълумот ички ишлар органларига етказилиб, қонунга мувофиқ жавобгарликка тортилади.
Тошкент шаҳар ИИББ ҳам итни ёқиб юборган фуқаронинг шахсни аниқлаш билан шуғулланмоқда.
Сўнгги вақтларда ҳайвонларни қийнашга оид видеолар интернетда кенг тарқалмоқда.
Июнь ойида Тошкентдаги эркак кучугини отгани тасвирланган видео пайдо бўлганди. Кейинроқ маълум бўлишича, итнинг эгаси танишига мурожаат қилиб, уни отиб ташлашни сўраган. Бунга ит қариндошларидан бирини тишлаб олгани сабаб бўлган. Суд ушбу ҳолатга алоқадор тўрт кишига жарима белгилаган эди.
Июль ойида Тошкент шаҳар ҳокимлиги қошидаги қутқарув хизмати ходимлари бир итни бўри деб ўйлаб калтаклагани тасвирланган видео тарқалган эди. Ҳайвон ҳалок бўлган. Маъмурий ишлар бўйича Яшнобод тумани суди ходимларни айбдор деб топган ва жарима белгилаган.Самарқандда август ойида Spark ва Nexia автомобили ҳайдовчилари атайдан итнинг устига машина ҳайдагани, яна бир видеода ППХ ходими итга ғишт отгани тасвирланган эди. Самарқанд ҳуқуқ-тартибот идоралари ушбу воқеани инобатга олмаган, иш судгача етиб бормасдан тугатилган.
Изоҳ (0)