Кўп қаватли уйнинг ертўласида балиқ боқса бўладими? (видео) 

«Human.uz» мухбирлари Тошкент шаҳри Чилонзор тумани 3-мавзе 36 А-уйда яшовчи фуқаролардан тушган оммавий шикоят бўйича ўрганиш ўтказди.

Мурожаатга кўра, улар яшайдиган 36 А-уйнинг ертўласи шу уйни қурган пудратчи ташкилот «Шарқ темир» МЧЖ томонидан шу ерда яшовчи аҳоли ихтиёрига берилмай келинмоқда.

«‘Шарқ темир’ ушбу уйнинг ертўласини тадбиркорларга сотганлиги аҳоли томонидан айтилмоқда. Ва сотиб юборилган ушбу жойда балиқ цехи фаолият олиб бормоқда. Қизиқ, аҳоли яшайдиган кўп қаватли уй ертўласида балиқ боқишни қандай тушуниш мумкин?!

Шу ерда яшовчилар умумий фойдаланиши учун берилиши керак бўлган ертўладан фойдалана олмаётганликларини айтишган. Лекин бу ерни сотиш Олий суд томонидан ноқонуний экани тасдиқланган.

Бир неча бор мазкур ҳолат юзасидан тегишли давлат органларига мурожаатлар қилинган. Ҳатто Олий суд томонидан бу масала аҳоли фойдасига ҳал қилинган», — дейилади хабарда.

Бироқ кейинчалик қурилиш ташкилотининг Олий суд раисига мурожаатидан сўнг Олий суд олдинги ўзи қабул қилган қарорини бекор қилган ва бу иш пудратчи ташкилот фойдасига ҳал қилиб берилган. Шундан кейин орадан бир ҳафта ўтгач, фуқаролар Олий суд раиси қабулида бўлади. Олий суд раиси бу масалани қайта ўрганиб чиқишини айтган.