“Turkiston islom harakati” xalqaro terroristik tashkilotiga a’zo bo‘lib, Pokiston hududidagi jangovor harakatlarda ishtirok etgan O‘zbekiston fuqarosi 9 yilga ozodlikdan mahrum etildi, deb xabar beradi O‘zA.
Botir Madaminov 1986-yil Andijon viloyatining Asaka tumanida tug‘ilgan.
U 2008—2010-yillarda otasi va ikki nafar ukasi bilan Rossiyaga ishlash uchun bir necha marotaba borib keladi. Keyinroq bir o‘zi Moskva viloyatining Serpuxova tumaniga ishlash uchun boradi.
U 2011-yilning dekabr oyiga qadar farg‘onalik Abdurahim va andijonlik Umid ismli shaxslar bilan birgalikda qurilish ishlarida ishlaydi. Ammo bu ikki kimsa “Jihodchilar” diniy ekstremistik tashkilotining “Moskva jamoati” a’zolari bo‘lganligi bois ular asta-sekin Botirni “hijrat”, “jihod” qilishga da’vat etadi. Natijada Botir ularga ergashib, “Jihodchilar” oqimining “Moskva jamoati” a’zosiga aylanadi.
2011-yil dekabr oyida esa u Pokistonning Mir-Ali shahriga borib, “Turkiston islom harakati” xalqaro terrorchilik tashkilotiga qo‘shiladi.
Dastlab u jangarilar tayyorlash lagerida qurol-yarog‘ hamda portlovchi qurilmalar bilan ishlash usullarini o‘rganadi. So‘ngra 2012—2013-yillar davomida “Nosir” taxallusi ostida Pokiston hukumati qo‘shinlariga qarshi jangovar harakatlarda ishtirok etadi.
2013-yilning kuz faslida “Turkiston islom harakati” tashkiloti Pokiston qurolli kuchlarining jiddiy qarshiligiga uchragach, 2014-yilning noyabr oyida ular Afg‘onistonga o‘tadi.
2015-yilning oxirida Botir Madaminov “Islom davlati Xuroson viloyati” terroristik guruhi safiga qo‘shilib, 2016-2018-yillarda guruh a’zolariga oziq-ovqat mahsulotlarini tarqatish bilan shug‘ullanadi
2019-yilning 3-aprel kuni Botir Madaminov O‘zbekistonga qaytarildi.
Botir Madaminovning sodir etgan qilmishlari atroflicha ko‘rib chiqildi va u 9 yil muddatga ozodlikdan mahrum etildi.
Izoh (0)