Ўзбекистонда автомобиль йўлларининг узунлиги 184 минг километр 2008 йилдан 2017 йилгача автомобиль йўллари кўкаламзорлаштириш ишлари тизимли олиб борилмаган, суғориш тизими режали амалга оширилмаган. Бу ишлар учун 2008 йилдан 2017 йилгача 46,5 миллиард сўм сарфланган, яъни деярли ҳавога учирилган, деб ёзади «Ekologuz» Telegram канали.
2020 йилдан йўл четларига экилган дарахт ва гулларни томчилаб суғориш тизими орқали кўкаламзорлаштириш режалаштирилган. Шунингдек, йўл четларига бир йиллик гуллар экилмайди ва фойдаланилаётган қўл меҳнати камайтирилади. Буларнинг барчасини янги барпо этиладиган «Йўл кўкалам суғориш» ташкилоти амалга оширади.
2020 йил 1 майдан умумий фойдаланишдаги йўллар четидаги ўсимликлар рўйхатга олиниб, ахборот-компьютер тизимига киритилади.
Автомобиль йўлларни кўкаламзорлаштириш соҳасидаги кадрларни қайта тайёрлаш ва малакасини ошириш маркази ишга туширилиб, унда ободонлаштириш мутахассислари жаҳон тажрибаси асосида ўқитилади. Дарахтларни тўғри буталаш, ўсимликларни тўғри парвариш қилиш, йўл четидаги дарахт ва буталар шовқинни, заҳарли газларни ютиб, ўрнига кислород чиқариши борасидаги билимлари оширилиб, кўникмалари шакллантирилади.
Буларнинг барчаси Ўзбекистон Президентининг «2020−2024 йилларда умумий фойдаланишдаги автомобиль йўлларини кўкаламзорлаштириш ва меъморий-ландшафт лойиҳалаштиришни ривожлантириш чора-тадбирлари тўғрисида»ги қарори лойиҳасида кўзда тутилган бўлиб, у умумий муҳокамага қўйилди.
Изоҳ (0)