Жорий йилнинг август ойида Тошкентдаги Mont Blanc пластик жарроҳлик клиникасида 5 кун ичида икки бемор аёл вафот этгани ҳақида хабар берилганди. Бош прокуратуранинг маълум қилишича, август ойининг ўзида ушбу клиникада жарроҳлик амалиётини ўтказган уч киши вафот этган.
Биринчи ҳолат: 1 август куни Тошкент шаҳар Шайхонтоҳур туманида жойлашган Mont Blanc хусусий шифохонасида фуқаро У.Бахрановга бурун қийшиқларини тўғирлаш юзасидан жарроҳлик амалиёти ўтказилганидан сўнг, беморнинг соғлиғи ёмонлашганлиги сабабли 20 августда Москва шаҳрида жойлашган шифохонага ётқизилган. Бироқ унга кўрсатилган тиббий муолажаларга қарамасдан У.Бахранов вафот этган.
Иккинчи ҳолат: 15 август куни Қозоғистон фуқароси Л.Апостоловага Mont Blanc хусусий клиникасида ташқи бурун деформацияси ва бурун тўсиғи қийшайишини тўғирлаш бўйича жарроҳлик амалиёти ўтказилган ҳамда бурун тўсиғи қийшайиши тўғирланган.
Жарроҳлик амалиётидан сўнг бемор мустақил нафас олишга ўтказилган ва унга антибактериал даво мақсадида «Цефтриаксон» дори воситаси ички қон томири орқали 1,0 мл. миқдорида юборилган. Шундан сўнг, беморнинг аҳволи кескин оғирлашган ва чуқурлаштирилган текширишлар ўтказиш мақсадида Республика шошилинч тиббий ёрдам илмий марказига олиб борилган.
19 август куни марказ шифокорлари томонидан кўрсатилган тиббий муолажаларга қарамасдан Л.Апостолова шифохонанинг жонлантириш бўлимида вафот этган.
Учинчи ҳолат: 24 август куни Mont Blanc хусусий клиникасида фуқаро Г.Шарифовага бурун соҳасида жарроҳлик амалиёти ўтказиш вақтида унга юборилган наркоз нотўғри таъсир қилиши натижасида аҳволи оғирлашган. Натижада шу куннинг ўзида беморнинг яқин қариндошлари томонидан Akfa medline хусусий шифохонасига (клиник ўлим ҳолатида) олиб келинган.
26 август куни шифокорлар томонидан тиббий муолажалар кўрсатилганлигига қарамасдан Г.Шарифова шифохонанинг жонлантириш бўлимида вафот этган.
Мазкур ҳолат бўйича тўпланган ҳужжатлар Бош прокуратурада ўрганилиб, 12 ноябрь куни Жиноят кодексининг 116-моддаси (Касб юзасидан ўз вазифаларини лозим даражада бажармаслик) 4-қисми «а,б» бандлари билан жиноят иши қўзғатилган. Ҳозирда ушбу жиноят иши бўйича Шайхонтоҳур туман прокуратурасида дастлабки тергов ҳаракатлари олиб борилмоқда, унинг бориши Бош прокуратура томонидан назоратга олинган.
Бундан ташқари, туман прокуратураси томонидан юқоридаги каби ҳолатларни келгусида содир этилишини олдини олиш бўйича Соғлиқни сақлаш вазирилигига тақдимнома киритилган.
Изоҳ (0)