Бош прокуратура ҳузуридаги департаментнинг Ангрен шаҳар бўлими томонидан ўтказилган терговга қадар текширув давомида 1,2 миллиард сўм маблағни одамларни алдаш орқали қўлга киритган фирибгарларга нисбатан жиноят иши очилди. Бу ҳақда Бош прокуратура матбуот хизмати хабар берди.
Таъкидланишича, А.У.Г. МЧЖ таъсисчиси Ш.О. ва раҳбари I.Ф. олдиндан бириктириб, республикада ишлаб чиқарилган автомашиналарни кредит ва лизинг шартномалари асосида олиб бериш ҳақида фуқароларни алдаб, ишончини суиистеъмол қилиб, 61 нафар фуқароларнинг 1,2 миллиард сўм пул маблағларини фирибгарлик йўли билан қўлга киритган.
Шунингдек, текширувда Ш.О. ва I.Ф. фаолияти давомида Ш.О.нинг турмуш ўртоғининг номига Lacetti, Cobalt, Nexia-3, Spark ва Damas русумли жами 13 та автомашиналарни харид қилиб, жиноий йўл билан топилган даромадларини легаллаштирганликлари фош этилган.
Мазкур ҳолат юзасидан, А.У.Г. МЧЖ таъсисчиси Ш.О. ва раҳбари I.Ф.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Аввалроқ UzAuto Motors компаниясининг ИИВга йўллаган мурожаати юзасидан Тергов департаменти томонидан «Авто олтмиш ой» масъулияти чекланган жамиятининг мансабдор шахслари ва бошқаларга нисбатан жиноят иши қўзғатилгани ҳақида хабар берилганди.
Изоҳ (0)