“Mehr va oqibat” hayvonlarni himoya qilish jamiyati a’zolari benzin quyib itni yoqib yuborgan fuqaroning shaxsini aniqlashga yordam berganga 2 million so‘m mukofot e’lon qildi. Bu haqda jamiyat o‘zining Facebook’dagi sahifasida ma’lum qildi.
Unda aytilishicha, ijtimoiy tarmoqlarda erkakning voyaga yetmagan bola ko‘z o‘ngida o‘zining ovcharka zotli itining ustidan benzin quyib, yoqib yuborgani aks etgan video tarqalgan. Oqibatda it qiynoqlarda jon bergan.
Qayd etilishicha, gumonlanuvchining ismi Bahodir bo‘lib, uni biron-bir manzil bo‘yicha ko‘rganlardan +99897 455 41 12 raqamiga qo‘ng‘iroq qilib xabar berish so‘ralgan.
“Mehr va oqibat” jamiyati itni yoqib yuborgan erkakni topishga yordam berganga 2 million so‘m miqdorida mukofot va’da qilgan. Uning shaxsi aniqlangach, ma’lumot ichki ishlar organlariga yetkazilib, qonunga muvofiq javobgarlikka tortiladi.
Toshkent shahar IIBB ham itni yoqib yuborgan fuqaroning shaxsni aniqlash bilan shug‘ullanmoqda.
So‘nggi vaqtlarda hayvonlarni qiynashga oid videolar internetda keng tarqalmoqda.
Iyun oyida Toshkentdagi erkak kuchugini otgani tasvirlangan video paydo bo‘lgandi. Keyinroq ma’lum bo‘lishicha, itning egasi tanishiga murojaat qilib, uni otib tashlashni so‘ragan. Bunga it qarindoshlaridan birini tishlab olgani sabab bo‘lgan. Sud ushbu holatga aloqador to‘rt kishiga jarima belgilagan edi.
Iyul oyida Toshkent shahar hokimligi qoshidagi qutqaruv xizmati xodimlari bir itni bo‘ri deb o‘ylab kaltaklagani tasvirlangan video tarqalgan edi. Hayvon halok bo‘lgan. Ma’muriy ishlar bo‘yicha Yashnobod tumani sudi xodimlarni aybdor deb topgan va jarima belgilagan.Samarqandda avgust oyida Spark va Nexia avtomobili haydovchilari ataydan itning ustiga mashina haydagani, yana bir videoda PPX xodimi itga g‘isht otgani tasvirlangan edi. Samarqand huquq-tartibot idoralari ushbu voqeani inobatga olmagan, ish sudgacha yetib bormasdan tugatilgan.
Izoh (0)