Россия Халқлар дўстлиги университетининг (РУДН) тиббиёт факультети талабаси, галоперидол дори воситаси уколидан кейин комага тушган ўзбекистонлик Ўлмасхон Бахронов Москвадаги 67-шифохонада вафот этди. Бу ҳақда Facebook’даги «Samarkand & Samarkand» гуруҳида Ўлмасхоннинг амакиси Фарруҳхон Шукруллаев маълум қилган.
22 ёшли Ўлмасхон 13 ноябрь куни соат 20:45 да вафот этган.
Амакисининг маълум қилишича, унинг жанозаси 15 ноябрь куни Самарқанд вилоятининг Самарқанд тумани «Қуйи Чордара» маҳалласида бобосининг уйида бўлиб ўтади.
Аввалроқ талаба нотўғри белгиланган дори воситаси сабабли комага тушгани маълум қилинганди. Йигит онасининг таъкидлашича, шифокор Ўлмасхонни гиёҳванд модда қабул қилишда гумон қилиб, унга галоперидол буюрган. Восита киритилгандан кейин Ўлмасхоннинг юраги тўхтаб қолган.
Йигитнинг юрагини ишга туширишга муваффақ бўлинган, бироқ бу орада унинг миясига шикаст етган ва у 67-шифохонанинг жонлантириш бўлимига ётқизилган. Йигитнинг яқинлари бу ҳолат юзасидан текширув ўтказиш талаби билан Россия ва Ўзбекистон соғлиқни сақлаш вазирликлари ва бош прокуратураларига мурожаат қилган.
Ташқи ишлар вазирлиги 20 октябрь куни Ўлмасхон Баҳронов иши бўйича баёнот бериб, мазкур масала Ўзбекистоннинг Россиядаги элчихонасининг доимий назоратида турганини маълум қилган эди.
Изоҳ (0)