«Кўп квартирали уйларни бошқариш тўғрисида»ги қонун 7 ноябрь куни эълон қилинди. Norma’нинг хабар беришича, қонун нормалари айрим туман ва шаҳарларда дастлабки синовдан ўтказилади, кейин эса тузатишлар киритилиши мумкин ва шундан кейингина улар кучга киради.
Бу ҳужжат ушбу соҳани тартибга солувчи қонун ҳужжатининг учинчи версияси ҳисобланади. Биринчи қонун 1999 йилда, иккинчиси 2006 йилда қабул қилинган эди.
Қонуннинг янги таҳрири амалдагисидан фарқи қуйидагича:
- биринчидан, унда айрим атамаларга («кўп квартирали уй» ва бошқалар) таърифлар берилган, уйларга туташ ҳудудларга муносабатлар ва бошқа умумий қоидалар янада батафсил тартибга солинган;
- иккинчидан, бир тарафдан, Уй-жой коммунал хизмат кўрсатиш вазирлиги томонидан соҳани мувофиқлаштириш йўналишлари ва уй-жой фонди инспекциясининг назорат ваколатлари, бошқа тарафдан эса уй-жойлар мулкдорларининг ҳуқуқ ва мажбуриятлари қайд этилди. Кўп квартирали уйларнинг бошқарув органларини давлат томонидан қўллаб-қувватлаш дастаклари кўпайтирилди – авария ҳолатларини тугатишда ҳамда соҳа учун кадрларни тайёрлаш ва қайта тайёрлашда кўмаклашиш улар жумласига киритилди;
- учинчидан, тартиб-таомилларга оид масалаларга – кўп квартирали уйларни бошқариш усулини танлаш ва ўзгартириш тартибига, бундай шаклларнинг ҳар бирининг жиҳатларига – бино мулкдорлари, бошқарувчи ташкилотлар ёки бошқарувчи ёхуд ХUMSҲ томонидан бевосита бошқарув (ҳар бир шаклига алоҳида боб бағишланган);
- тўртинчидан, маҳаллий ҳокимият ва фуқароларнинг ўзини ўзи бошқариш органлари ўзаро муносабатларининг ўзига хос хусусиятлари белгиланди. Жойлардаги ҳокимият органларига ва уларнинг мансабдор шахсларига кўп квартирали уйларни бошқарувчи органларнинг ишига аралашиш тақиқланди. Банк кредитларини олишда ҳокимиятлар кафил бўлиши мумкинлиги белгиланди. Субъектлар кўп квартирали уйларга туташ ҳудудларда ободонлаштириш ва кўкаламзорлаштириш ишларини ташкил этиш ва бошқа масалалар юзасидан ташкилотлар билан ҳамкорлик қиладилар.
Эслатиб ўтамиз, жорий йил бошидан пойтахтнинг Юнусобод туманида кўп квартирали уй-жой фондини бошқариш бўйича тажриба ўтказилмоқда. Тажриба доирасида барча ваколатлар профессионал бошқарув компанияларига берилган.
Қонуннинг тўлиқ матни билан қуйидаги ҳавола орқали батафсил танишиб чиқиш мумкин.
Изоҳ (0)