Ўзбекистон хурмо экспорти бўйича дунёнинг етакчи учлигидаги ўрнини йўқотди

Ўзбекистон 2018 йил якунига кўра хурмо экспорти бўйича дунёнинг етакчи учлигидаги ўз ўрнини йўқотиб, уни Хитойга бўшатиб берди.

EastFruit таҳлилчилари маълумотига кўра, йил давомида Ўзбекистондан хурмо экспорти 55 минг тоннани ташкил этди, бу 2017 йилга нисбатан 18 минг тоннага кам. Хитой хурмо экспорти ҳажмини камайтирганига қарамай, экспорт рейтингида Ўзбекистонни ортда қолдирди.

Ўзбекистоннинг деярли барча хурмоси Қозоғистон ва Россия бозорларига етказиб берилган. Нисбатан камроқ ҳажмда Туркманистон ва Қирғизистонга ҳам экспорт қилинган. Бироқ савдо манбаларига кўра, Қирғизистон ва Қозоғистонга етказиб берилган Ўзбекистон хурмосининг катта қисми кейинчалик Россия бозорига қайта экспорт қилинган.Шу билан бирга, Ўзбекистондан Беларусь ва Украинага хурмо етказиб бериш ҳажми сезиларли даражада ўсгани қайд этилган. Беларусга экспорт 3 баравардан ошиб, 763 тонна, Украинага эса икки бараварга кўпайиб, 593 тоннани ташкил этиган. Ўзбекистон хурмосининг синов партияси БАА бозорига ҳам сотувга чиқарилган.

Испания ва Озарбайжон дунёда хурмо экспорти бўйича етакчи бўлди, бу давлатлар 2018 йилда мос равишда 168,3 минг тонна ва 150,9 минг тонна маҳсулот экспорт қилган. Хурмо экспорти бўйича етакчилик қилган 20 та давлатлар қаторидан, шунингдек, Грузия, Тожикистон ва Арманистон ҳам ўрин олган.