Риштонда икки нафар вояга етмаган қиз ис газидан заҳарланиб вафот этди

Фарғона вилоятининг Риштон туманида вояга етмаган икки қиз газдан заҳарланиб вафот этди. Бу ҳақда Бош прокуратураси жамоатчилик билан алоқалар ва ҳуқуқий ахборот бўлими бошлиғи Ҳаёт Шамсутдинов «Дарё»га маълум қилди.

11 ноябрь куни соат 06:30 ларда Риштон тумани «Зарариқ» маҳалласида яшаган вояга етмаган опа-сингиллар яшаш хонадонидаги ҳаммомга ювиниш мақсадида кирган ва ҳаммомни иситиш учун қўлбола усулда ясалган печга уланган табиий газ ўчиб қолиши натижасида табиий газдан заҳарланиб, ҳодиса жойида вафот этган.

Мазкур ҳолат юзасидан туман прокуратураси томонидан терговга қадар текширув ҳаракатлари ўтказилмоқда.

Об-ҳаво совиши билан Ўзбекистонда ис газидан заҳарланиб ҳалок бўлиш ҳолатлари тобора кўпайиб бормоқда. Жумладан, 23 октябрь куни Хоразм вилояти Янгиариқ тумани, Остона қишлоғида яшовчи 45 ёшли К.Ғ., турмуш ўртоғи ва 2 нафар фарзандлари қўлбола исситиш печини ёнида ухлаб қолиб, хона ичига тарқалган ис газидан заҳарланиб, вафот этди.

28 октябрь куни Қўқон шаҳар Туркистон кўчасида яшовчи 1967 йилда туғилган Н.Ғ. исмли эркак, унинг турмуш ўртоғи ва бир нафар ўғли хонадон ичида тарқалган ис газидан заҳарланиб вафот этган.

2 ноябрь куни соат 23:00 ларда Самарқанд шаҳар Боёвут кўчасида яшовчи фуқаро Ф.К. яшаш хонадонида ўрнатилган сув иситиш газ «колонка»сидан сизиб чиққан ис газидан заҳарланиб, вафот этган.

4 ноябрь куни Самарқанд шаҳридаги Қорасув массивидаги янги қурилаётган кўп қаватли уйларда устачилик қилаётган 7 киши ис газидан заҳарланган.

Аввалроқ, Ўзбекистонда 2 кунда 10 киши ис газидан заҳарланди, 2 нафари ҳалок бўлгани ҳақида хабар берилган эди.