10 ноябрда мухолифат, полиция ва мамлакат армияси босими остида истеъфога чиққан Боливия президенти Эво Моралес Мексикага йўл олди. Бу ҳақда Reuters хабар қилди.
Моралес ҳамда унинг тарафдорлари Боливиянинг Чиморе шаҳрида Мексика ҳукумати тақдим этган самолётга ўтирган ва мамлакатни тарк этган. Мексика ташқи ишлар вазири Марсело Эбрард Twitter’да собиқ президентнинг Шимолий Америка мамлакати ҳимояси остида эканлигини билдирган. У қўлида Мексика байроғини ушлаган Моралеснинг самолётда ўтиргани акс этган суратни ҳам Twitter’даги саҳифасига жойлаштирган.
Моралес ўз Twitter’ида Мексикага кетаётганини тасдиқлаган ва мамлакат ҳукуматидан кўрсатилган ёрдам учун миннатдорлик билдирган. Собиқ президент янги куч ва қувват билан Боливияга қайтишини ваъда қилди.
2006 йилдан бери Боливия президенти сифатида мамлакатни бошқарган Эво Моралес 20 октябрда ўтган президентлик сайловларида тўртинчи марта ғолиб чиққанидан кейин истеъфога чиқишини эълон қилган. Истеъфо полиция ва армия ўзаро бирлашиб, мухолифатни қўллаб-қувватлагани оқибатида юз берган. Моралес ушбу вазиятни давлат тўнтариши деб баҳолаган.
10 ноябрда Боливияда мухолифат тарафдорлари Patria Nueva (PRN) давлат радиостанцияси ва Bolivia TV (BTV) миллий телеканали жойлашган бинони қўлга олгани, 11 ноябрда Боливия давлат раҳбари Эво Моралеснинг мамлакатда янги президентлик сайловлари ўтказилишини маълум қилган ва мухолифат вакили Карлос Меса ушбу хабарга муносабат билдириб Боливиянинг амалдаги президенти янги сайловларида қатнашмаслиги лозимлигини қайд этган. Кейинчалик Моралес истеъфога чиққанини эълон қилди ва пойтахт Ла-Пасни тарк этди. Мексика ташқи ишлар вазири Марсело Эбрард мамлакат Боливия собиқ президенти Эво Моралесга пойтахт Ла-Пасдаги элчихонасида бошпана беришга тайёр эканлигини маълум қилди. Боливия собиқ президенти эса Эво Моралес Москва билан алоқага чиқмаган ва Россиядан бошпана сўрамаганлигини билдирди.
Изоҳ (0)