10-noyabrda muxolifat, politsiya va mamlakat armiyasi bosimi ostida iste’foga chiqqan Boliviya prezidenti Evo Morales Meksikaga yo‘l oldi. Bu haqda Reuters xabar qildi.
Morales hamda uning tarafdorlari Boliviyaning Chimore shahrida Meksika hukumati taqdim etgan samolyotga o‘tirgan va mamlakatni tark etgan. Meksika tashqi ishlar vaziri Marselo Ebrard Twitter’da sobiq prezidentning Shimoliy Amerika mamlakati himoyasi ostida ekanligini bildirgan. U qo‘lida Meksika bayrog‘ini ushlagan Moralesning samolyotda o‘tirgani aks etgan suratni ham Twitter’dagi sahifasiga joylashtirgan.
Morales o‘z Twitter’ida Meksikaga ketayotganini tasdiqlagan va mamlakat hukumatidan ko‘rsatilgan yordam uchun minnatdorlik bildirgan. Sobiq prezident yangi kuch va quvvat bilan Boliviyaga qaytishini va’da qildi.
2006-yildan beri Boliviya prezidenti sifatida mamlakatni boshqargan Evo Morales 20-oktabrda o‘tgan prezidentlik saylovlarida to‘rtinchi marta g‘olib chiqqanidan keyin iste’foga chiqishini e’lon qilgan. Iste’fo politsiya va armiya o‘zaro birlashib, muxolifatni qo‘llab-quvvatlagani oqibatida yuz bergan. Morales ushbu vaziyatni davlat to‘ntarishi deb baholagan.
10-noyabrda Boliviyada muxolifat tarafdorlari Patria Nueva (PRN) davlat radiostansiyasi va Bolivia TV (BTV) milliy telekanali joylashgan binoni qo‘lga olgani, 11-noyabrda Boliviya davlat rahbari Evo Moralesning mamlakatda yangi prezidentlik saylovlari o‘tkazilishini ma’lum qilgan va muxolifat vakili Karlos Mesa ushbu xabarga munosabat bildirib Boliviyaning amaldagi prezidenti yangi saylovlarida qatnashmasligi lozimligini qayd etgan. Keyinchalik Morales iste’foga chiqqanini e’lon qildi va poytaxt La-Pasni tark etdi. Meksika tashqi ishlar vaziri Marselo Ebrard mamlakat Boliviya sobiq prezidenti Evo Moralesga poytaxt La-Pasdagi elchixonasida boshpana berishga tayyor ekanligini ma’lum qildi. Boliviya sobiq prezidenti esa Evo Morales Moskva bilan aloqaga chiqmagan va Rossiyadan boshpana so‘ramaganligini bildirdi.
Izoh (0)