Тожикистоннинг Турсунзода шаҳри аҳолиси 9 ноябрь куни Ширкент дарасида қўлида қурол ушлаган шубҳали одамларни кўриб уларни террорчи деб гумон қилган ва ҳуқуқ-тартибот идораларига бу ҳақда хабар берган, деб ёзмоқда «Regnum».
Келиб тушган маълумот асосида Душанбе—Турсунзода автотрассасига қуролланган ҳарбийлар қўриқлайдиган блокпостлар жойлаштирилди, шаҳарга зирхли техника ва вертолётлар юборилди. Вертолётлар тоғ ҳудудини айлангач, дарада қора кийим кийган шубҳали шахслар юргани тасдиқланган. Ўзбекистон чегарачилари ҳам чегара ҳудудида қуролли одамлар юргани ҳақида вақтида огоҳлантирилган.
Бироқ якунда маҳаллий аҳолининг маълумоти ўз тасдиғини топмади. Шубҳали қуролланган шахслар маҳаллий овчилар бўлиб чиқди.
Барчаси ойдинлашгач, блокпостлар олиб ташланди, аскарлар ва ҳарбий техника ўз манзилига қайтарилган.
Махсус операция вақтида «Дўстий» қўриқлаш пости ёпилмаган, икки давлат ўртасида 17 та чегара пости ўз фаолиятини давом эттирмоқда.
Мавзуга доир: Тожикистон чегара постига ИШИД жангарилари уюштирган ҳужумнинг қўшимча тафсилотлари маълум бўлди (фото)
8 ноябрь куни Тожикистон бош прокуратураси чегара постига уюштирилган ҳужум юзасидан жиноят иши очган, Ўзбекистон чегарачилари эса террорчилик ҳужумидан сўнг Тожикистон билан чегарадош ҳудудларни қўриқлашни кучайтирган. Кейинчалик ИШИД ушбу ҳужум учун масъулиятни ўз зиммасига олган. Тожикистон томондан ҳалок бўлганларнинг сони 2 эмас балки 6 нафар экани маълум бўлди, бироқ ҳукумат ушбу маълумотни расман тасдиқламаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)