Financial Times: Башар Асаднинг қариндошлари «Москва-Сити»дан 19 та кўчмас мулк харид қилган

Сурия президенти Башар Асаднинг олти нафар қариндоши 2013—2019 йиллар оралиғида Россия пойтахти Москва шаҳрида камида 20 та кўчмас мулк объектини, жумладан «Москва-Сити» ишбилармонлар марказидаги осмонўпар турар жойлардан квартиралар харид қилган. Бу ҳақда Financial Times газетасининг коррупцияга қарши курашиш бўйича Global Witness нодавлат ташкилоти ҳужжатлари асосида маълумот берган.

18 та шоҳона квартира ва офис хоналари «Пойтахтлар шаҳри» комплексида жойлашган. Уларнинг майдони 102 дан 233 квадрат метргача. Башар Асаднинг қариндошлари «Федерация» минорасидан 1243 квадрат метр кенгликка эга квартираларни сотиб олган. Шунингдек, ‘Москва-Сити’ яқинида оиланинг 3 хонали квартираси бор. Асадлар оиласининг Россиядаги кўчмас мулкининг умумий қиймати 40 миллион АҚШ долларига баҳоланмоқда. Улар тўртта объектдан турар жой сифатида фойдаланади, биттаси ижарага берилади, қолган қисмидан эса тижорат мақсадида фойдаланилади.

Кўчмас мулкка Башар Асаднинг халқаро санкциялар қўлланилган жиянлари ва уларнинг қариндошлари эгалик қилади. Сурия президентининг жияни Ҳафиз Маҳлуф Москвадаги энг пулдор қариндошлардан бири ва 22,3 миллион долларлик 13 та объектнинг, уларга алоқадор Россия компанияларининг эгаси ҳисобланади. Ушбу улкан харидлар учун мураккаб кредит схемаларидан фойдаланилган, дея қайд этган Global Witness суриштирувини ўтказган муаллифлар. Мақолада Ҳафиз Махлуфнинг компанияларидан бири Сбербанк хизматларидан фойдалангани қайд этилган, лекин банк ушбу маълумотга изоҳ бермади.

Россиянинг Саудия Арабистонидаги собиқ элчиси Андрей Бакланов Financial Times’га берган интервьюсида Башар Асад қариндошларининг Москвадан кўчмас мулк харид қилишига Ғарбнинг уларга нисбатан кескин молиявий санкциялар қўллагани сабаб бўлганини таъкидлади.

«Сурия зодагонларининг ўзларини хотиржам ҳис қиладиган ва пулларини бехавотир инвестиция сифатида киритиши мумкин бўлган шаҳардан кўчмас мулк сотиб олишини табиий ҳолат деб баҳолаш мумкин», — дейди собиқ элчи.

Москвадаги кўчмас мулкнинг харидорлари Суриядаги энг обрўли иккита оиланинг биттаси бўлган Махлуф уруғидир. 2011 йилгача ушбу гуруҳ Сурия иқтисодиётининг 60 фоизини назорат қилган. Башар Асаднинг жияни Рами Махлуф (‘Москва-Сити’дан рафиқаси номига квартира олган) Суриядаги энг бой бизнесмен ва ‘президентнинг оилавий банкири’ ҳисобланади. Сўнгги йилларда Асад оиласи ва Махлуфлар ўртасидаги муносабатларнинг кескинлашуви кузатилгани ҳақида маълумотлар тарқалган.