Bashar Asad IShID yetakchisi yo‘q qilingani haqidagi xabarlardan shubhalanmoqda

Suriya prezidenti Bashar Asad rasmiy Damashqning IShID yetakchisi Abu Bakr Al-Bag‘dodiyning o‘lganligi haqidagi xabarlarga ishonarli dalillar taqdim etilmaguniga qadar ishonmasligini ma’lum qildi. Bu haqda “Izvestiya” xabar berdi.

“Damashq Al-Bag‘dodiyni yo‘q qilish masalasini Amerika harbiylari bilan muhokama qilmagan. Operatsiya chindan ham o‘tkazilganmi yoki yo‘q, bizga qorong‘u”, — deya ta’kidlagan Bashar Asad. U Vashington hanuzgacha Bag‘dodiyning o‘lganini tasdiqlaydigan dalillarni taqdim qilmagani va Damashqning IShID yetakchisini yo‘q qilishdagi yordami haqida OAV orqali xabardor bo‘lganini qayd etgan.

Shuningdek, Suriya prezidenti terroristik mafkura mavjud ekan Al-Bag‘dodiy kabi rahnamolarning o‘ldirilishi mutlaqo ahamiyat kasb etmasligini ma’lum qildi.

27-oktabrda Suriyaning Idlib viloyatida AQSh harbiylarining Iroq, Suriya, Turkiya, Rossiya hamda kurdlar bilan hamkorlikda operatsiya o‘tkazgan va IShID yetakchisi Abu Bakr Al-Bag‘dodiy yo‘q qilingan. Donald Tramp ushbu ma’lumotni rasman tasdiqlagan va Bag‘dodiyning tunnelda o‘zini-o‘zi portlatib yuborganini qayd etgan.

Eron TIV ushbu ma’lumotga munosabat bildirib, AQShning o‘zi yaratgan IShID yetakchisini yo‘q qilganligini ta’kidlagan.30-oktabrda Pentagon IShID yetakchisini yo‘q qilish bo‘yicha operatsiya tafsilotlari va harbiy harakatlar videosidan parcha e’lon qildi. 31-oktabrda IShID Al-Bag‘dodiyning o‘lganini tasdiqladi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.