Нукусда Қорақалпоқ тиббиёт институтини ташкил этиш кўзда тутилган. Ҳукуматнинг бу ҳақдаги тегишли қарори лойиҳаси жамоатчилик муҳокамаси учун эълон қилинди.
Қарор лойиҳасига кўра, янги олийгоҳ Тошкент педиатрия тиббиёт институтининг Нукус филиали негизида ташкил этилади. Ушбу таклиф Ўзбекистон Соғлиқни сақлаш вазирлиги, Олий ва ўрта махсус таълим вазирлиги, Иқтисодиёт ва саноат вазирлиги, Молия вазирлиги ва Қорақалпоғистон Жўқорғи Кенгеси томонидан берилган.
Қорақалпоқ тиббиёт институти фаолиятининг асосий йўналишлари этиб
- замонавий талабларга мос келадиган ва ҳозирги замон тиббиётининг илғор технологияларини эгаллаган юқори малакали тиббиёт кадрлари ва илмий мутахассисларини тайёрлаш;
- республиканинг олий тиббиёт таълими тизимида тиббиёт соҳаси бўйича ўқув жараёнини ташкил этишда замонавий таълим технологиялари асосида ахборот ва мултимедиа ускуналаридан фойдаланган ҳолда илғор хорижий тажрибани жорий этиш;
- олий таълимнинг инвестициявий жозибадорлигини ошириш, хорижий таълим ва илм-фан технологияларини жалб этиш;
- касалликларини эрта аниқлаш ва даволашда тиббиёт соҳаларидаги илғор ютуқлардан фойдаланган ҳолда фундаментал, инновацион, илмий-амалий тадқиқотлар ва ишланмаларни амалга ошириш;
- аҳолига тиббиёт соҳасида юқори малакали даволаш-профилактика ёрдамини кўрсатган ҳолда касалликлар диагностикаси, профилактикаси ва уларни даволашнинг илғор инновацион усулларини татбиқ этиш;
- таълим, фан, инновация ва илмий-тадқиқотлар натижаларини тижоратлаштириш фаолиятининг узвий боғлиқлигини таъминлаш;
- талаба-ёшлар таълим-тарбияси учун қўшимча шароитлар яратишга қаратилган комплекс чора-тадбирларни ўз ичига олган бешта ташаббусни амалиётга татбиқ этиш
Янги институтда ўқиш 2020/2021 ўқув йилидан бошланиши кутилмоқда. Олийгоҳ Нукус шаҳрининг Дўсназаров кўчасидаги 104 ва 108-уйларга жойлаштирилади. 2021 йилдан эса институт талабалари учун 300 ўринли ётоқхона қурилиши бошланади.
Изоҳ (0)