Ўзбекистон ташқи ишлар вазирининг биринчи ўринбосари Илҳом Неъматов бошчилигидаги делегация Анталия саноат зонасига ташриф буюрди, дея хабар бермоқда Ташқи ишлар вазирлиги матбуот хизмати.
Делегация аъзолари янги авлод иссиқхона мажмуаларини ишлаб чиқаришга ихтисослашган Туркиянинг Demeter Sera компанияси фаолияти билан танишган. Компания раҳбари Бариш Гукче Ўзбекистоннинг қишлоқ хўжалиги ва тўқимачилик саноатида ўз компанияси фаолиятини кенгайтиришдан манфаатдор эканлигини тасдиқлаган.
Бундан ташқари, Туркияда LED ёритгичларини ишлаб чиқаришда етакчилардан бири бўлган Fiberli корхонаси раҳбарияти билан музокаралар олиб борилган. Учрашув якунига кўра Fiberli менежерларининг Ўзбекистонга ташрифини ташкил этиш тўғрисида келишувга эришилган.
Ўзбекистон делегацияси, шунингдек, биологик ўғитлар ва ўсимликларни зараркунандалардан ҳимоя қилиш воситаларини ишлаб чиқарувчи Agricim корхонасига ҳам ташриф буюрган. Туркия томони Ўзбекистон қишлоқ хўжалиги учун қўшма органик маҳсулот ишлаб чиқаришни ташкил этиш борасида ҳамкорликни ўрганишга қизиқиш билдирган.
Изоҳ (0)