Sirdaryoda Captiva va Lacetti haydovchilari janjallashib, bir-biriga tan jarohati yetkazdi

Jinoyat ishlari bo‘yicha Sirdaryo viloyati Mirzaobod tumani sudi tomonidan jamiyatda yurish-turish qoidalarini qasddan mensimagan, o‘zaro janjallashib, bir-biriga turli darajadagi tan jarohatni yetkazgan ikki nafar haydovchining harakatlari yuzasidan jinoyat ishi ko‘rib chiqildi. Bu haqda “Postda” nashri xabar berdi.

Ish hujjatlariga ko‘ra, sudlanuvchi Akmal Botirov (ism-shariflari o‘zgartirilgan) Lacetti rusumli avtomashinasini yo‘lovchilarsiz Guliston—Dehqonobod yo‘nalishi bo‘ylab boshqarib kelayotgan bo‘lgan. Ushbu avtomobil yo‘lining qarama-qarshi yo‘nalishidan esa Hasan Boyirov ichida yo‘lovchilar bo‘lgan Captiva rusumli avtomashinasini uzoqni yorituvchi chiroqlarni yoqqan holda boshqarib kelgan. Natijada Akmal Botirov boshqaruvidagi avtomashina yo‘lning qarama-qarshi tomoniga chiqib, Captiva’ning harakatlanishiga to‘sqinlik qilgan.

Bu voqeadan so‘ng haydovchilar yo‘l chetida to‘xtab o‘zaro janjallashib, bir-birini urib, turli tan jarohatini yetkazishadi. Shu vaqtda Matiz rusumli avtomashinasida harakatlanib kelgan profilaktika inspektori va boshqalar ularni zo‘rg‘a ajratadi.

Voqeaga oydinlik kiritish maqsadida ular Mirzaobod tumani IIB binosiga keltiriladi. Ikki haydovchi shunda ham tegishli xulosa chiqarmaydi. Ularning janjali bu joyda yana davom etadi.

“Qisqasi, haydovchilarning janjali qimmatga tushdi. Akmal Botirovning ukasi avtomashinani ta’mirlab berishni so‘rab borganida Captiva haydovchisi Hasan Boyirov xarajatdan qochib, uni urib, og‘ir tan jarohati yetkazadi. Sud ekspertiza xulosalari va boshqa taqdim etilgan hujjatlarga tayanib, javobgarning qilmishiga yarasha ajrim chiqardi: U jabrlanuvchining davolanishi uchun ketgan xarajatlarni to‘lash barobarida, Lacetti avtomashinasini ham ta’mirlab berishga majbur bo‘ldi”, — deyiladi xabarda.

Avvalroq Toshkent shahar Olmazor tumanida haydovchilar o‘rtasida kelishmovchilik yuz bergani haqida xabar berilgan edi. Unda haydovchilardan biri to‘pponcha bilan o‘qtalgan. Keyinchalik aniqlanishicha, ushbu to‘pponcha plastmassadan tayyorlangan o‘yinchoq bo‘lgan.