Қозоғистон нефть маҳсулотларини автотранспортда олиб чиқишга вақтинчалик тақиқ қўйди. Бу Ўзбекистон ва бошқа мамлакатларга ёқилғи экспорт қилиш билан боғлиқ.
«Адилет» норматив-ҳуқуқий ҳужжатлар веб-сайтида эълон қилинган Қозоғистон Энергетика вазирлиги, Ички ишлар вазирлиги, Молия вазирлиги ва Миллий хавфсизлик қўмитаси томонидан имзоланган қўшма қарорда шу ҳақда сўз боради. Ҳужжат олти ой давомида автотранспортда мамлакатдан нефть маҳсулотларини олиб чиқишни кўзда тутади.
Ҳужжатда айтилишича, олти ой давомида ЕОИИ ТИФТН кодларининг 2709, 2710, 2902, 3403, 3811 гуруҳларига тегишли товарларнинг транспорт воситалари орқали Қозоғистон Республикаси ҳудудидан олиб чиқилиши тақиқланади.
«Автотранспорт воситаларининг ишлаб чиқарувчиси томонидан тақдим этилган ва техник шартларга мувофиқ ўрнатилган бензобаклар, шунингдек, ҳажми 20 литрдан кўп бўлмаган алоҳида идишларда экспорт қилиш ҳоллари бундан мустасно», — дейилади ҳужжатда.
ТАСС’нинг Қозоғистон Энергетика вазирлиги матбуот хизматига таянган ҳолда хабар беришича, буйруқ 2 ноябрдан кучга кирди. Аввалроқ, идора мамлакатда бензин ва дизел ёқилғисининг чакана нархлари Россия, Ўзбекистон ва Қирғизистонга нисбатан паст экани, бу республика чегарасига яқин вилоятларда транзит транспортлари орқали ёқилғи-мойлаш материалларининг юқори истеъмолига олиб келаётганини таъкидлаганди.
Изоҳ (0)