Тошкент давлат иқтисодиёт университети ректори Баҳодир Ходиев ишдан олинди. Бу ҳақда блогер Хушнуд Худойбердиев ўзининг Telegram-каналида маълум қилди.
«Бугун, Президент маслаҳатчилари Шерзод Кудбиев ва Абдужаббор Абдувоҳидов ҳамда ДХХ, прокуратура органлари вакиллари бошчилигида ўтказилган йиғилишда олий таълим муассасалари уйғониши зарур эканлиги, бундан буён қабул жараёнидан бошлаб битириш жараёнига қадар очиқлик ва ошкоралик тамойиллари асосий бўлиши, бунга қарши чиққанларга эса қатъий жазо кўрилиши таъкидланди.
Бунинг биринчи исботи сифатида ТДИУ ректори Баҳодир Ходиев лавозимидан озод этилди. Бунинг ортидан ‘Нархозъда катта тозалаш ишлари ҳам амалга оширилиши таъкидланди», — дейилади хабарда.
Баҳодир Ходиев 1960 йили Тошкент шаҳрида туғилган. 1982 йилда Тошкент халқ хўжалиги институтини «Иқтисодий маълумотларга ишлов беришни ташкил этиш» мутахассислиги бўйича тамомлаган. Иқтисод фанлари доктори, профессор. 2000 йилда «Ўзбекистон иқтисодиётида тадбиркорликни ривожлантиришни эконометрик моделлаштириш» мавзусида докторлик диссертациясини ҳимоя қилган. 2016 йилнинг майидан буён Тошкент давлат иқтисодиёт университети ректори лавозимида ишлаб келаётганди.
Изоҳ (0)