Президент Шавкат Мирзиёевнинг 2019 йил 27 февралдаги Ф-5445-сон фармойишига мувофиқ, йил давомида Қорақалпоғистон Республикаси, Хоразм ва Сирдарё вилоятларида кўзи ожизлар кутубхоналари учун янги бинолар қурилиши керак эди, бироқ бу топшириқ ўз вақтида бажарилмай қолмоқда. Бу ҳақда Ўзбекистон маданият вазири ўринбосари Камола Оқилова Сенатнинг Ёшлар, маданият ва спорт масалалари қўмитасида берган ҳисоботида маълум қилди, дея хабар бермоқда «Дарё» мухбири Мусулмонбек Иброҳимов.
Камола Оқилованинг маълум қилишича, Президент имзолаган ҳужжатга мувофиқ, 2019 йилда Қорақалпоғистон Республикаси, Хоразм ва Сирдарё вилоятлари кўзи ожизлар кутубхоналари учун янги бино қуриш, Қорақалпоғистондаги иккита, Сирдарё, Сурхондарё ва Хоразмдаги туманларда жойлашган биттадан кўзи ожизлар кутубхоналарини бошқа биноларга кўчириш ва уларнинг филиалларига хоналар ажратиш белгиланган.
Ҳукуматнинг 2018 йил сентябрдаги қарорига мувофиқ, Маданият вазирлиги томонидан Қорақалпоғистон Республикаси, Сирдарё ва Хоразм вилоятларида янги қуриладиган кўзи ожизлар кутубхоналари лойиҳа-смета ҳужжатлари ишлаб чиқилган, аммо Молия вазирлиги томонидан керакли миқдорда маблағ ажратилмаганлиги сабабли қурилиш ишлари бошланмаган.
Камола Оқилованинг қайд этишича, Маданият вазирлиги 2019 йил июль ойида қурилиш учун маблағ ажратиш бўйича Инвестиция ва ташқи савдо вазирлиги ва Молия вазирлигига кўрсатма беришни сўраб, Вазирлар Маҳкамасига хат киритган. Ундан аввалроқ, февраль ойида эса учала ҳудуд маъмуриятларига авария ҳолатига келиб қолган кўзи ожизлар кутубхоналари учун янги бинолар қуриш, ажратиш, таъмирлаш, жиҳозлаш ва штатлар ажратишда амалий ёрдам сўраб мурожаат қилинган.
Йиғилишда қатнашган Молия вазирлиги бўлим бошлиғи Анвар Ҳасановнинг сўзларига кўра, Қорақалпоғистон, Сирдарё ва Хоразмдаги кўзи ожизлар учун кутубхоналарнинг қурилишига пул ажратилмаётганида Маданият вазирлигининг қисман айби бор.
«Йиллик инвестиция дастури ҳар йилнинг июнь—август ойларида шакллантирилади, масалан, 2020 йил учун инвестиция дастури 2019 йилнинг ёзида тайёрланган. Шу вақтда вазирлик ва идоралар келгуси йилда амалга оширилиши керак бўлган лойиҳалар рўйхатини тайёрлаб беради. Маданият вазирлиги учун 2019 йилда 29,9 миллиард сўм ажратилган, лекин айтилаётган кутубхоналар қурилиши учун маблағ кўзда тутилган. Кўрсатилган биноларни қуриш 2020 йилги дастурга киритилган», — деди Молия вазирлиги вакили.Молия вазирлиги вакилининг сўзларига жавобан, сенаторлар кўзи ожизлар учун кутубхоналарни 2019 йилда қуриб битказиш ҳақидаги топшириқ Президент томонидан берилгани, агар бирор топшириқ кечиктирилаётган бўлса, муддатни узайтириш бўйича Президентга ахборот киритиш кераклиги, шундагина муаммо ечим топиши мумкинлигини таъкидлаб ўтди.
Изоҳ (0)